Akizungumza kwenye mkutano uliofanyika ikulu ya White House kati yake na kundi la wabunge weusi siku moja baada ya mazishi ya Nichols, rais Biden amesema anaamini mkasa huo utachochea wabunge kuona umuhimu wa kuchukua hatua kukomesha matendo ya aina hiyo.

Tyre Nichols, mmarekani mweusi mwenye umri wa miaka 29 aliaga dunia mjini Memphis mnamo Januari 10, siku tatu baada ya kushambuliwa vibaya na polisi waliomsimamisha kwa ukaguzi wa usalama barabarani.

Kifo chake kimezusha hasira miongoni mwa wamarekani na kuibua upya mjadala juu ya mageuzi katika idara za polisi ambayo chama cha rais Biden kimejaribu kuyapitisha bungeni bila mafanikio tangu mwaka 2020.