Hayo ndiyo yalikuwa mazingira ya mkutano kati ya Rais Museveni na wafanyabiashara ambao wiki tatu zilizopita walifanya mgomo wakipinga kodi zinazotozwa kwa bidhaa zinazoagizwa kutoka mataifa ya kigeni. Rais Museveni mwanzoni alisikiliza hoja mbalimbali kutoka kwa viongozi wa wafanyabiashara hao:

Akiwajibu, Rais Museveni aliwambia kuwa wapende wasipende lazima watalipa kodi na ushuru kama ilivyopangwa na mamlaka ya mapato. Aliwambia kuwa azma ya serikali yake ni kukomesha uagizaji wa vitu ambavyo vinaweza kutengenezwa humu nchini. Ndiyo maana bidhaa hizo zikiwemo nguo, vyakula na vitu vya matumizi nyumbani vitalengwa kupandishiwa kodi. "Mnatakiwa kufahamu kuwa ikiwa mnaipenda nchi yenu mnatakiwa kuondokana na kuagiza bidhaa tunazoweza kutengeneza humu nchini. Huo ndiyo uzalendo wa kiuchumi." Alisema Museveni.

Wafanyabiashara hao aidha walikuwa wanapinga matumizi ya teknolojia kufuatilia mauzo yao na kutoa risiti za kidigitali. Hii huwezesha mamlaka ya mapato kuwatoza kodi kamili ya mauzo yao kama ilivyo katika mataifa jirani ya Kenya na Tanzania. Lakini wamefahamishwa kuwa maendeleo ya teknolojia hayawezi kuepukika katika mazingira ya sasa ya TEHAMA na biashara za kimataifa. Mfanyabiashara mmoja alsiema Teknolojia hii ni ngumu na ghali kwetu kwa sasa tunaomba iahirishwe. 

Rais Museveni alijibu kwa kusema "hatuwezi kuahirisha matumizi ya teknolojia katika kukusanya kodi na ushuru"

Lakini kwa upande mwingine, hali hii ya rais kuwa ndiye hutoa maamuzi ya mwisho kuhusu masuala ambayo wizara na taasisi zingine zingeshughulikia imeelezewa kuwa isiyostahili. Hii ni kwa sababu kiongozi wa taifa ana majukumu mengi ambayo mawaziri na watendaji wengine serikalini wanafaa kuyashughulikia.

Wafanyabiashara walimwambai rais kwamba waliamua kufanya mgomo kwa sababu mawaziri na watendaji walipuuzilia malalamiko yao kwa muda mrefu. Mchambuzi wa masuala ya kisiasa na uchumi, John Kibego, ana mtazamo huu: "Ni kama mawaziri na watu wengine hawana mamlaka ya kufanya maamuzi ni vikaragosi tu katika utawala"

Viongozi wa wafanya biashara wamesema kuwa watarudi kwenye mkutano na wenzao ili wafanye maamuzi kuhusu mwelekeo aliouchukua Rais Museveni ambaye kwa wengi wao hakutatuwa shida zao muhimu na badala yake ameziwacha kama zilivyo.