Rais wa Zanzibar ateuwa Tume ya Uchaguzi
24 Agosti 2023![Zanzibar | Rais Hussein Mwinyi](https://static.dw.com/image/60803234_800.webp)
Katika uteuzi uliotangazwa Alhamis na kusambazwa na Ofisi ya Katibu Mkuu Kiongozi, Rais Mwinyi amemteuwa Jaji George Joseph Kazi kuwa mwenyekiti mpya.
Jaji huyo wa Mahakama Kuu anachukuwa nafasi ya Jaji Mstaafu Hamid Mahmoud ambaye upinzani unambebesha tuhuma za kile wanachokiita "uvurugaji uchaguzi wa mwaka 2020."
Walioteuliwa wana sifa za kikatiba
Uteuzi huu unahusishwa na matokeo ya vikao vya Tume ya Maridhiano iliyoundwa na Rais Mwinyi ikiwa sehemu ya makubaliano yake na aliyekuwa makamu wake wa kwanza, Marehemu Maalim Seif Sharif Hamad, na ambayo imepewa jukumu la kupeta mabadiliko ya kisheria na kiutendaji ili kuizuwia Zanzibar kurudi kwenye siasa za migawanyiko.
Wajumbe waliochaguliwa kutoka chama cha ACT Wazalendo kupitia mapendekezo ya kiongozi wa chama cha upinzani katika Baraza la Wawakilishi ni mwanasheria Awadh Ali Said na Ayoub Bakari Hamad na wale walioteuliwa kwa mapendekezo ya mkuu wa shughuli za serikali katika Baraza la Wawakilishi ni Juma Haji Ussi na Idrissa Jecha, ambao wana uzoefu wa utumishi wa Tume ya Uchaguzi kwa muda mrefu.
Wajumbe wengine ni Jaji wa Mahakama Kuu ya Zanzibar,Aziza Iddi Suweid, ambaye amechaguliwa kupitia mapendekezo ya Mahakama na wa mwisho ni Halima Mohammed Said ambaye amechaguliwa kupitia mamlaka ya uteuzi aliyopewa rais ya kumteuwa mtu yeyote mwenye sifa zilizotajwa kikatiba.
Hakuna taarifa kuhusu mkurugenzi wa tume ya uchaguzi
Wachambuzi wa masuala ya kisiasa wanasema uteuzi huu ni muhimu kwa sababu ya Zanzibar inakabiliwa na chaguzi ndogo ndani ya kipindi kifupi kijacho, ukiwemo wa uwakilishi wa jimbo la Mtabwe kwenye ngome ya upinzani kisiwani Pemba.
Hata hivyo, hadi sasa hakuna taarifa zozote juu ya Mkurugenzi wa Tume ya Uchaguzi, Thabit Idarous Faina, kuendelea au kutoendelea nafasi yake, akiwa miongoni mwa wateule waliopingwa na kukataliwa waziwazi na chama cha ACT Wazalendo.
Faina, kama ilivyo kwa aliyekuwa mwenyekiti wa tume hiyo, Jaji Mstaafu Mahmoud, anashutumiwa na upinzani kwa kuhusika kuuchafua uchaguzi wa 2020 uliomleta Rais Mwinyi madarakani.