Waziri mkuu wa Italia Bwana Silvio Berlusconi ameitaka Marekani kuheshimu uhuru wa nchi hiyo. Hii inafuatia ripoti kuwa wafanyakazi wa shirika la ujasusi la Marekani CIA wamemteka nyara kiongozi wa dini ya Kiislamu mjini Milan miaka miwili iliyopita.

Berlusconi ametoa taarifa hiyo baada ya kumuita balozi wa Marekani kutaka maelezo zaidi juu ya tukio hilo.

Kwa mujibu wa ripoti, CIA wamevunja sheria za Italia kwa kumkamata kiongozi huyo wa dini na kumpeleka Misr, ambako inaaminika kuwa aliteswa.

Wiki iliyopita, jaji mmoja mjini Milan alitoa hati ya kukamatwa wafanyakazi 13 wa CIA wanaotuhumiwa kufanya tukio hilo la utekaji nyara.