Hakuna ishara ya kupunguka ile idadi ya wakimbizi wa Kiafrika wanaoelekea visiwa vya Kanary nchini Hispania.Siku ya Jumatatu,Waafrika 250 katika boti tatu,walitua kwenye pwani za visiwa vya Teneriffa na La Gomera kusini mwa Hispania.Miongoni mwao hakuna hata mmoja aliekuwa na pasipoti.Nchini Italia nako,boti tano zilizopakia zaidi ya wakimbizi 650 zilizuiliwa na walinzi wa pwani karibu na Sicily na Lampedusa.