Klabu ya soka ya Paderborn inayoshiriki ligi kuu ya kandanda ya Ujerumani, Bundesliga, imewasajili wachechaji wawili akiwemo mlinda mlango Moritz Schulze pamoja na mshambuliaji Paschal Steinwender ikiwa ni juhudi za kukiimarisha kikosi chao kwa ajili ya misimu miwili ijayo ya ligi hiyo.

Taarifa ya kusajiliwa kwa wachezaji hao, imethibitishwa Jumatano na uongozi wa klabu hiyo ambayo hivi sasa inapambana kujiokoa katika mkasi wa kushuka daraja.

Schulze mwenye umri wa miaka 19 anahamia klabu hiyo ya Paderborn akitokea katika klabu ya RB Leipzig katika kikosi wachezaji walio chini ya umri wa miaka wakati Steinwender anajiunga na timu hiyo akitokea klabu ya Oldenburg ya daraja la nne.

"Moritz na Paschal ni wachezaji wawili wazuri sana, ambao wanataka kupiga hatua nyingine katika maendeleo yao ya michezo na sisi,"alisema Fabian Wohlgemuth, afisa mkuu mtendaji wa michezo katika ukurasa wa mtandao wa kijamii wa klabu hiyo.

Klabu ya Paderborn kwa hivi sasa inaburura mkia katika msimamo wa ligi kuu ya kandanda ya Ujerumani Bundesliga ikiwa na alama Nane kibindoni huku ikisaliwa na michezo mitano katika msimu wa ligi hiyo iliyochelewa kumalizika kufuatia mripuko wa virusi vya Corona.

Chanzo/dpa