Waziri Mkuu wa Uingereza Keir Starmer anatarajiwa kuwakaribisha Rais wa Ukraine Volodymyr Zelenskiy, Rais wa Ufaransa Emmanuel Macron na Kansela wa Ujerumani Friedrich Merz mjini London kwa mazungumzo kuhusu kuendelea kuisaidia Ukraine.

Nchi hizo tatu za Ulaya, zinazojulikana kama kundi la E3, zimekuwa miongoni mwa waungaji mkono wakuu wa Ukraine tangu Urusi ilipoanzisha uvamizi wake kamili mwaka 2022.

Uingereza na Ufaransa pia zinaongoza mpango wa "muungano wa hiari" unaolenga kutoa dhamana za usalama kwa Ukraine kama sehemu ya juhudi za kufikia amani ya kudumu.

Mkutano huo unafanyika wakati Ukraine ikiendelea kuonyesha uwezo wa kushambulia maeneo ya ndani ya Urusi kwa kutumia ndege zisizo na rubani.

Hivi karibuni, mashambulizi ya droni za Ukraine yalilenga mji wa St. Petersburg, mji wa pili kwa ukubwa nchini Urusi, ambapo watu watatu walijeruhiwa kwa mujibu wa mamlaka za eneo hilo.

Mashambulizi yaendelea pande zote

Wakati viongozi hao wakijiandaa kwa mazungumzo, mashambulizi kati ya Urusi na Ukraine yameendelea kusababisha vifo na uharibifu.

Katika mkoa wa Zaporizhzhia kusini mwa Ukraine, shambulizi la droni la Urusi lilimuua dereva wa basi mwenye umri wa miaka 56.

Mtu mwingine mwenye umri wa miaka 59 aliuawa katika mkoa wa Dnipropetrovsk baada ya mashambulizi ya droni na mabomu ya angani.

Mashambulizi hayo pia yalijeruhi mtu mmoja na kuharibu miundombinu mbalimbali.

Kwa mujibu wa jeshi la anga la Ukraine, Urusi ilirusha droni 236 usiku mmoja, ambapo 215 zilidunguliwa.

Kituo cha nyuklia chashambuliwa

Shambulizi jingine la Urusi limesababisha uharibifu wa sehemu ya ghala la kuhifadhi taka za nyuklia katika eneo la Chornobyl nchini Ukraine.

Kampuni ya taifa ya nishati ya nyuklia ya Ukraine, Energoatom, ilisema jengo hilo halikuwa na vifaa vya nyuklia wakati wa shambulizi na viwango vya mionzi vilibaki katika hali ya kawaida.

Rais wa Ukraine alisema Urusi ililenga kwa makusudi kituo hicho cha kuhifadhi mafuta ya nyuklia yaliyotumika karibu na kinu cha nyuklia cha Chornobyl.

"Leo, Warusi kwa mara nyingine wamelenga eneo maalumu la Kituo cha Nyuklia cha Chornobyl. Droni aina ya Shahed iligonga moja ya majengo ya Kituo cha Kati cha Kuhifadhi Mafuta ya Nyuklia Yaliyotumika," Zelenskyy aliandika kwenye mtandao wa X.

Alielezea tukio hilo kuwa ni shambulizi dhidi ya miundombinu nyeti sana na kuliita "shambulizi ovu sana la Urusi."

Waziri wa Mambo ya Nje wa Ukraine Andriy Sybiga pia aliishutumu Urusi kwa kuhatarisha usalama wa nyuklia kupitia mashambulizi yake.

Putin akataa kukutana na Zelenskiy

Katika juhudi za kidiplomasia, Zelenskiy alimtumia Rais wa Urusi Vladimir Putin barua ya wazi akipendekeza mkutano wa ana kwa ana pamoja na usitishaji kamili wa mapigano.

Hata hivyo, Putin alikataa pendekezo hilo na kusema haoni sababu ya kukutana na kiongozi huyo wa Ukraine.

Wakati huo huo, uchumi wa Urusi unaendelea kukabiliwa na changamoto zinazotokana na vita, ikiwemo kupanda kwa bei, ongezeko la kodi, gharama kubwa za mikopo na upungufu wa wafanyakazi.

Mkutano wa London unatarajiwa kujadili hatua za kuongeza shinikizo kwa Moscow huku ukiangalia njia za kuimarisha msaada wa kijeshi, kisiasa na kiuchumi kwa Ukraine.