Umoja wa Mataifa unasema hayo wakati mapigano yaliyodumu kwa miezi saba yakizidi kushika kasi kati ya jeshi la Sudan na wanamgambo wa RSF.

Mratibu wa masuala ya kiutu wa Umoja huo nchini Sudan Clementine Nkweta-Salami amesema hali ni ya kutia wasiwasi na hawana namna zaidi ya kuielezea kuhusiana na kile kinachotokea nchini humo.

Amesema bado wanaarifiwa juu ya visa vya unyanyasaji wa kutisha wa ngono, watu kupotezwa kinguvu, vifungo vya kiholela na ukiukwaji mkubwa wa haki za binaadamu na watoto.

Mratibu huyo aidha ameonya juu ya mashaka ya mauaji ya kimbari kutokea tena kama ya miaka ya 2000 kwenye jimbo hilo la Darfur.