Taiwan imesema iko katika hali ya juu ya tahadhari baada ya kubaini ufyetuaji kadhaa wa makombora upande wa China bara, siku chache baada ya serikali ya mjini Beijing kufanya jaribio la kombora la masafa marefu linaloweza kuvuka bara moja hadi lingine.

Wizara ya ulnzi ya Taiwan imesema imegundua ufyetuaji huo wa makombora na kitengo cha ufyetuaji makombora cha China na jeshi katika mikoa na maeneo ya ndani ya Mongolia, Gansu, Qinghai na Xinjiang kuanzia saa moja kasoro dakika kumi Jumamosi iliyopita.

China ilifanya jaribio la kombora la masafa marefu Jumatano wiki iliyopita, likilifyetua katika bahari ya Pasifiki, katika jaribio lake la kwanza kabisa la aina hiyo.