Maafisa wa serikali walitangaza kwamba watu 19 walikufa baada ya ndege ya abiria ya shirika la ndege za Precision la nchini Tanzania kuanguka katika ziwa Viktoria wakati ikikaribia kutua uwanjani. Afisa mwandamizi wa polisi amesema kulikuwa kunanyesha wakati ndege ilipotumbukia majini. Waziri Mkuu wa Tanzania Kassim Majaliwa alipandisha idadi ya waliokufa kutoka watatu waliotangazwa awali. Maafisa walisema awali kwamba watu 26 kati ya 43 waliokuwemo kwenye ndege hiyo iliyokuwa inatokea Dar es Salaam kuelekea Bukoba, waliokolewa na kupelekwa hospitali. Haikubainika wazi iwapo idadi mpya ya vifo inahusisha watu waliokufa hospitali.