Rais wa Marekani Donald Trump ameukosoa Umoja wa Mataifa akisema umejaa maneno matupu na kwamba taasisi hiyo haisaidii katika kuleta amani ulimwenguni. Trump ameyasema hayo wakati akihutubia viongozi wa dunia wanaohudhuria Baraza Kuu la Umoja wa Mataifa mjini New York. Katika hotuba yake iliyokuwa ikisubiriwa kwa shauku, Trump amesema taasisi ya Umoja wa Mataifa ina uwezo mkubwa wa kutatua migogoro lakini haijafanikiwa hata kidogo katika kutekeleza hilo.

Akijitamba kukomesha vita saba, Trump ameongeza kwamba katika hali zote hizo, Umoja wa Mataifa haukuweza hata kusaidia na kuhoji juu ya jukumu lake.

Rais Trump amelitumia jukwaa hilo kuelezea migogoro kadhaa, ikiwemo vita vya Gaza, mpango wa nyuklia wa Iran, suala la wahamiaji, vita vya Ukraine na mengineyo.