Ushindi wa Mrepublican huyo mwenye utata, ukifuatia moja ya kampeni zenye uhasama zaidi katika historia ya kisasa ya Marekani, ulikuwa wa kushangaza zaidi ikizingatiwa mkururo wa mashtaka yasiyo na kifani yaliyofunguliwa dhidi yake, jaribio la kuuawa, na onyo kutoka kwa mkuu wake wa zamani wa utumishi kwamba yeye ni "fashisti." "Ni ushindi wa kisiasa ambao nchi yetu haijawahi kushuhudia hapo awali," Trump alisema katika sherehe ya ushindi huko Florida.

Makamu wa Rais Harris, ambaye aliingia kwenye kinyang'anyiro mnamo Julai baada ya Rais Joe Biden kusitisha kampeni yake, alifanya kampeni ya msimamo wa wastani iliyomulika ujumbe wa uchochezi wa Trump na matumizi ya mifano ya wazi ya ubaguzi wa rangi na jinsia.

Lakini onyo lake la kutisha kuhusu uhamiaji na kuunga mkono sera ya kujitenga viliweza kuwafikia wapiga kura walioathiriwa na athari za kiuchumi kufuatia janga la UVIKO-19, na wanaotaka mabadiliko kutokana na miaka ya Biden.

Soma piaViongozi wa dunia wamimina pongezi kwa Trump: 

Kampeni ilionyesha kinyang'anyiro chenye ushindani mkali, lakini matokeo yalikuja kwa haraka sana, yakileta ushindi mzito ambao ulijumuisha ushindi katika majimbo muhimu ya Georgia, North Carolina, na Pennsylvania. Trump ndiye rais wa kwanza zaidi ya karne moja kushinda muhula wa pili ambao si wa mfululizo.

Pia ndiye mtu pekee kuchaguliwa akiwa na kesi ya udanganyifu -- atakabiliwa na hukumu katika mahakama ya New York kwa udanganyifu mnamo Novemba 26. Trump, mwenye umri wa miaka 78, yuko katika njia ya kuvunja rekodi nyingine kama rais mzee zaidi aliyekalia kiti wakati wa kipindi chake cha miaka minne. Atampita Biden, ambaye anatarajiwa kumaliza muhula wake Januari akiwa na umri wa miaka 82.

Hofu ya machafuko huko mbeleni

Thamani ya Dola ya Marekani iliongezeka huku sarafu ya mtandaoni ya bitcoin ikifikia kiwango cha rekodi na masoko mengi ya hisa yakiendelea kuongezeka, huku wafanyabiashara wakibashiri ushindi wa Trump kadri matokeo yalivyokuwa yanaingia. Lakini machafuko yanaweza kuwa mbele.

Ushindi wa Trump unakuja na ahadi yake ya mabadiliko makubwa ya sera - si tu nyumbani bali pia nje, ambapo msimamo wake wa kujitenga na sera ya "Marekani Kwanza" unatarajiwa kuwa na athari kubwa.

Amekuwa akionyesha mara kwa mara kwamba angeweza kumaliza mzozo wa Ukraine kwa kuilazimisha Kyiv kukubali kutoa maeneo kwa Urusi, na tishio lake la kufukuza kwa wingi wahamiaji haramu limesababisha wasiwasi mkubwa katika bara la Amerika ya Kusini.

Soma pia:Trump ajitangaza mshindi wa urais Marekani 

Aidha, anarejea Ikulu ya White House kama mkanushaji wa mabadiliko ya tabianchi, akiwa tayari kubomoa sera za kijani za mtangulizi wake Biden na kuweka hatarini juhudi za kimataifa za kupunguza joto linalosababishwa na binadamu.

Hata kabla ya ushindi wa kushangaza wa Trump kuthibitishwa kikamilifu, viongozi wa kigeni walikimbilia kutuma pongezi. Hawa ni pamoja na washirika wa muda mrefu wa Trump, Waziri Mkuu wa Israeli Benjamin Netanyahu, Waziri Mkuu wa India Narendra Modi, na Rais wa Uturuki Recep Tayyip Erdogan.

Rais wa Ukraine Volodymyr Zelensky, ambaye anatarajiwa kuona kupungua kwa haraka kwa msaada wa kijeshi kutoka Marekani mara Biden atakapondoka ofisini, alimtumia ujumbe wa pongezi Trump. Zelensky alisema anatumai "ushindi wa kushangaza" wa Trump utaisaidia nchi yake kupata "amani ya haki."

Katibu Mkuu wa NATO, Mark Rutte, alisema Trump, ambaye mara kwa mara ameonyesha kuwa na hasira na muungano huo unaoongozwa na Marekani, ataufanya kuwa "na nguvu." Waziri Mkuu wa Uingereza Keir Starmer alijiunga na mkururo wa salamu za pongezi, wakati Rais wa Ufaransa Emmanuel Macron aliahidi kushirikiana na Trump kwa "heshima na dhamira."

Kiongozi asiyetabirika kamwe

Kwa ahadi zake za kulipiza kisasi dhidi ya maadui nyumbani na kukosoa washirika wa muda mrefu wa nje, Trump bado anajulikana kwa kutotabirika linapokuja suala la kutekeleza ahadi zake kwa vitendo. Mikutano yake ya kampeni, iliyojazwa na malalamiko, matusi, na madai ya upotoshaji, iligubikwa na matamshi makali. Lakini aliripotiwa vyema mitandaoni.

Alifanya kampeni yake kwa ahadi za kupunguza kodi, kupunguza udhibiti, na ongezeko kubwa zaidi la ushuru wa bidhaa katika karibu karne moja ili kuchochea ukuaji na kuongeza uzalishaji, licha ya onyo kuhusu vita vya kibiashara na bei za juu kwa watumiaji wa Marekani.

Soma pia: Wafahamu wagombea urais Marekani na sera zao

Ujumbe wake mkuu mara nyingi uligubikwa na tabia yake ya kuhamasisha lugha chafu na picha za vurugu. Lakini mtindo huo wa nguvu ulifanya kazi vizuri kwa wapiga kura wake watiifu, ambao wanamwona kama mtu wa nje ya mfumo wa Washington.

Alijipatia umaarufu kupitia ujumbe wake mkali dhidi ya wahamiaji na juhudi za kufikia wapiga kura wa tabaka la kati walioathirika na mfumuko wa bei uliosababishwa na janga la UVIKO-19.

Wakati Harris alipojiunga na kinyang'anyiro hicho mnamo Julai, akichukua nafasi ya Biden, alifanikiwa haraka kupunguza pengo kubwa la uongozi wa Trump dhidi ya rais katika tafiti za maoni.

Ujumbe wake wa umoja, kutilia mkazo haki za utoaji mimba na onyo kuhusu kitisho kinachletwa na Trump kwa demokrasia ulionekana kuwavutia wengi, kama ilivyoshuhudiwa katika ongezeko kubwa la ufadhili wa kampeni yake kupita ile ya mpinzani wake.

Hata hivyo, hatimaye, alishindwa kufikia ushindi ambao ungekuwa wa kihistoria kama mwanamke mweusi wa kwanza kuchaguliwa katika Ikulu ya White House.