Ujumbe wa viongozi wa Afrika umemtolea wito rais wa Urusi Vladimir Putin kuanzisha mazungumzo ya amani na Ukraine, wakati walipokutana na kiongozi huyo mjini St. Petersburg.

Rais wa Afrika Kusini Cyril Ramaphosa amenukuliwa akisema wana imani kubwa kwamba huu ni wakati muafaka kwa pande zote kuanza mazungumzo na kumaliza vita vinavyoendelea nchini Ukraine, huku rais wa Comoro Azali Assoumani ambaye pia ni mwenyekiti wa sasa wa Umoja wa Afrika, akihimiza kuanza mchakato wa makubaliano ya amani.

Hata hivyo, Putin aliyeivamia Ukraine Februari 2022, kwa mara nyingine ameilaumu Ukraine kwa kutokuwepo kwa mazungumzo hayo ya amani.

Ujumbe huo ambao pia una wawakilishi kutoka Misri, Senegal, Zambia, Congo na Uganda umesema umeandaa mpango wenye pointi 10, ambao ni sehemu ya mkakati wa amani.