Ukraine aidha imesema Moscow inazidisha mashambulizi yake nje ya mkoa wa Kharkiv, ulioko kaskazini mashariki mwa Ukraine.

Wizara ya ulinzi ya Urusi imesema wanajeshi wake wamechukua udhibiti wa kijiji cha Arkhangelske kinachopatikana kaskazini mwa mji wa Donetsk.

Kijiji hicho kidogo kilichopo kwenye uwanja wa vita kipo karibu na mji wa Ocheretyne ambao Urusi ilidai kuudhibiti mwezi uliopita.

Awali, Ukraine ilisema vikosi vyake vilizuia mashambulizi mawili katika eneo la Kharkiv na mapigano yalikuwa yanaendelea karibu na mji wa Vovchansk, ambao Moscow inajaribu pia kuuteka.

Rais wa Ukraine Volodymyr Zelensky amesema jana kwamba alitembelea Kharkiv na kukutana na maafisa kujadiliana namna ya kulilinda eneo hilo na hasa mji wa Vovchansk.