Rais Volodymyr Zelensky wa Ukraine amesema  Marekani  imeshindwa kutoa taarifa za mapema kuhusu makombora ya Urusi yaliyoshambulia nchi hiyo katika siku za karibuni.

Pia ameeleza wasiwasi kuhusu kupungua kwa ufanisi wa mfumo wa mawasiliano ya satelaiti wa Starlink unaotumiwa na jeshi la Ukraine vitani.

Zelensky amemtaka bilionea Elon Musk kusaidia kurejesha huduma hiyo kikamilifu, huku maafisa wa Ukraine wakidai kuwa vikwazo kwenye mfumo huo vimeathiri matumizi ya ndege zisizo na rubani zinazotumika katika operesheni za kijeshi.

Kwa upande wake, Musk amesema maamuzi kuhusu mfumo wa Starshield unaotumiwa na Ukraine hufanywa na serikali ya Marekani na si kampuni yake ya SpaceX.

Matamshi hayo yanakuja baada ya mashambulizi mapya ya Urusi yaliyosababisha vifo vya watu wasiopungua 15 na kuharibu miundombinu ya nishati katika maeneo mbalimbali ya Ukraine, ikiwemo mji mkuu Kyiv.