Tathmini hiyo imetolewa na viongozi wa majimbo ya mashariki katika wakati ambapo hii leo rais wa Ukraine Volodymyr Zelenskiy anakamilisha ziara yake kwenye makao makuu ya Umoja wa Ulaya mjini Brussels alikokwenda kusaka mshikamano na kuomba msaada zaidi wa silaha.

Serikali mjini Kyiv ilitabiri kuwa Urusi itazidisha hujuma zake katika wiki za kuelekea kutimia mwaka mmoja tangu Moscow ilipotuma vikosi vyake kwenye ardhi ya Ukraine Februari 24 mwaka jana.

Wakuu wa serikali kwenye majimbo ya mashariki mwa Ukraine ikiwemo Donetsk wamesema wanaamini kwamba Urusi tayari imeanzisha mashambulizi hayo ili kutafuta mafanikio ya kujitapa itakapotimia mwaka mmoja tangu ilipoivamia Ukraine.