Umoja wa Ulaya umetoa wito kwa wahusika wote nchini Senegal kushirikiana pamoja kwa ajili ya kuandaa uchaguzi wa haki na uwazi, jumuishi na wa kuaminika haraka iwezekanavyo.

Msemaji wa Umoja wa Ulaya, kwa Sera ya Mambo ya Nje na Usalama Nabila Massrali ametoa tamko hilo leo Jumapili kabla ya maandamano ya upinzani yanayotarajiwa kufanyika mjini Dakar.

Msemaji huyo wa Umoja wa Ulaya amesema kuahirishwa kwa uchaguzi wa rais nchini Senegal kunafungua kipindi cha kutokuwa na uhakika nchini humo.

Rais Macky Sall wa Senegal alitangaza kuahirishwa kwa uchaguzi uliopangwa kufanyika Februari 25 kwa muda usiojulikana, kwa kile alichokitaja kuwa ni kuanzishwa kwa uchunguzi dhidi ya madai ya rushwa miongoni mwa wagombea.

Rais Macky Sall hakutoa tarehe maalum ya uchaguzi lakini alisema majadiliano ya kitaifa yatafanyika ili kuhakikisha uchaguzi unakuwa huru, wa wazi na shirikishi.