Machado amerudia kauli yake kwamba mgombea wa upinzani Edmundo Gonzalez Urrutia ndiye mshindi halali akisema alishinda kwa asilimia 67 dhidi ya 30 za Maduro, kutokana na hesabu iliyofanywa katika vituo vingi vya kura kote nchini humo. Marekani na Umoja wa Ulaya wamezitaka mamlaka za Venezuela kutoa data kamili zauchaguzi huo, huku waziri wa mambo ya kigeni wa Marekani Antony Blinken akisema kuna "ushahidi wa kutosha" unaoonesha kwamba Gonzalez ndiye aliyeshinda uchaguzi. Uchaguzi huo wa Jumapili venezuela ulifanyika chini ya kiwingu cha onyo la Maduro kwamba kutakuwepo na "umwagikaji damu" endapo angeshindwa. Machado anasema karibu watu 20 wamefariki dunia kutokana na maandamano yaliyozuka baada ya uchaguzi huo.