Urusi yaituhumu Marekani kupanga shambulizi ikulu ya Kremlin
4 Mei 2023
Urusi imedai shambulizi hilo lilikuwa jaribio la Ukraine kutaka kumuua rais Putin.
Msemaji wa serikali ya Urusi Dmitry Peskov amesema, maamuzi ya kufanya mashambulizi kama hayo hayafanywi na Ukraine bali Marekani, na kwamba Ukraine hufanya tu kile inachoambiwa kufanya.
Marekani tayari imekanusha vikali shutuma hizo, huku msemaji wa Ikulu ya White House John Kirby akisema Peskov anasema uwongo. Ukraine vilevile imekanusha kuhusika.
Siku moja tu baada ya kisa hicho na Urusi kusema itajibu vikali, Urusi imefanya mashambulizi ya droni usiku kucha dhidi ya Ukraine kwa kutumia ndege zisizokuwa na rubani.
Mkuu wa sera za kigeni wa Umoja wa Ulaya Josep Borrell ameitahadharisha Urusi kutotumia madai ya shambulizi hilo la droni kuzidisha mgogoro wake na Ukraine.