Urusi inapanga kusitisha usafirishaji wa mafuta kutoka Kazakhstan kuelekea Ujerumani kupitia bomba la kuanzia Mei 1, hatua inayotishia kiwanda muhimu cha kusafisha mafuta kinachohudumia sehemu kubwa ya mahitaji ya nishati ya Berlin.

Kiwanda cha PCK kilichopo mjini Schwedt, takribani kilomita 100 kaskazini mwa Berlin, hupokea mafuta kupitia bomba hilo. Awali kilikuwa kikisimamiwa na kampuni ya Rosneft, lakini serikali ya Ujerumani ilichukua udhibiti wake baada ya uvamizi kamili wa Urusi nchini Ukraine mwaka 2022.

Tangu wakati huo, kiwanda hicho kimeanza kuagiza mafuta ghafi kutoka Kazakhstan kwa kiwango kinachoongezeka, yakisafirishwa kupitia ardhi ya Urusi hadi Berlin.

Wizara yathibitisha hatua hiyo

Wizara ya Uchumi na Nishati ya Ujerumani imethibitisha taarifa hiyo, ikisema kuwa kampuni ya Rosneft Germany imearifu mamlaka husika kuwa, kufuatia maelekezo kutoka Wizara ya Nishati ya Urusi, usafirishaji wa mafuta kupitia bomba la Druzhba utapigwa marufuku kuanzia Mei 1, 2026.

Hata hivyo, serikali ya Urusi bado haijathibitisha rasmi uamuzi huo kwa Ujerumani. Wakati huohuo, Rosneft Germany inaendelea kutathmini athari za hatua hiyo na kujiandaa kwa mabadiliko yoyote yatakayojitokeza.

Kiwanda muhimu kwa usambazaji wa nishati

Kiwanda cha PCK kinachangia zaidi ya asilimia 90 ya mafuta ya petroli, dizeli na mafuta ya kupasha joto yanayotumiwa Berlin na maeneo ya jirani.

Hata hivyo, hakitegemei kabisa mafuta ya Kazakhstan. Tangu 2022, sehemu kubwa ya mafuta huwasili kupitia bandari kama Rostock na pia kutoka Poland.

Licha ya hilo, kusitishwa kabisa kwa usambazaji kupitia Druzhba kutaleta changamoto kubwa, kwani takribani asilimia 17 ya mafuta yanayosindikwa na kiwanda hicho kila mwaka hupitia njia hiyo.

Serikali ya Ujerumani imesisitiza kuwa uhakika wa upatikanaji wa mafuta hautakuwa hatarini, ingawa uzalishaji wa kiwanda hicho unaweza kupungua.

Mzozo wa nishati waongezeka duniani

Habari hizi zinakuja wakati dunia inakabiliwa na mzozo mkubwa wa nishati. Vita dhidi ya Iran pamoja na kufungwa kwa Mlango Bahari wa Hormuz vimeathiri usambazaji wa mafuta kwa Ulaya na Asia na kusababisha bei kupanda.

Upungufu mkubwa umeonekana hasa kwa mafuta ya ndege, hali iliyosababisha mashirika ya ndege kupunguza safari. Kampuni ya Lufthansa, kwa mfano, imepunguza safari 20,000 kati ya Mei na Oktoba.

Tishio kwa usalama wa nishati Ulaya

Tangu uvamizi wa Ukraine mwaka 2022, Urusi imekuwa ikitumia nishati kama silaha ya kisiasa. Hali hii ilisababisha Umoja wa Ulaya kupunguza utegemezi wake kwa mafuta na gesi ya Urusi.

Kwa sasa, utegemezi wa gesi kutoka Urusi umeshuka hadi asilimia 12 mwaka 2025 kutoka asilimia 45 hapo awali, huku ule wa mafuta ukishuka hadi asilimia 2 kutoka asilimia 27.

Mpango wa REPowerEU unalenga kukomesha kabisa uagizaji wa nishati kutoka Urusi ifikapo mwaka 2027.

Mchumi Benjamin Hilgenstock anaonya kuwa Urusi itaendelea kuwa tishio kwa usalama wa nishati wa Ulaya kwa muda mrefu, hasa ikiwa bado kuna utegemezi wowote uliobaki.

Mustakabali wenye changamoto

Ingawa Urusi haijatoa kauli rasmi, Rais Vladimir Putin hivi karibuni alieleza uwezekano wa kusitisha usambazaji wa nishati kwa Ulaya.

Kwa upande mwingine, Kazakhstan imeashiria kuwa matatizo ya kiufundi, ikiwa ni pamoja na mashambulizi ya droni kutoka Ukraine, yanaweza pia kuchangia hali hiyo.

Licha ya changamoto hizi, kiwanda cha PCK kinaaminika kuwa na uwezo wa kupata vyanzo mbadala, kutokana na juhudi zilizofanywa tangu 2022 kupunguza utegemezi wa mafuta ya Urusi.

Hata hivyo, hali ya sasa inaendelea kuibua maswali kuhusu mustakabali wa usalama wa nishati nchini Ujerumani na barani Ulaya kwa ujumla.