Wanajeshi wa Ufaransa wameanza kuondoka nchini Niger
11 Oktoba 2023![Wanajeshi wa Ufaransa washika doria katika eneo la Madama karibu na mpaka na Libya mnamo Januari 1 2015](https://static.dw.com/image/66911730_800.webp)
Msemaji wa mkuu wa jeshi la Ufaransa, ameliambia shirika la habari la AFP kwamba kundi la kwanza tayari limeondoka nchini humo, hatua inayothibitisha tangazo la siku ya Jumatatu la utawala huo wa kijeshi wa Niger kwamba kikosi cha wanajeshi 1400 wa Ufaransa wataanza kuondoka nchini humo kuanzia siku ya Jumanne.
Soma pia:Nigeria yapongeza pendekezo la Algeria kuwa mpatanishi Niger
AFP imeripoti kuwa msafara wa wanajeshi pamoja na malori ya kusafirisha vifaa na magari ya vita kutoka Magharibi mwa Niger uliwasili katika mji mkuu wa Niamey mwendo wa saa sita mchana hapo jana.
Marekani yakatiza msaada kwa Niger
Haya yanajiri wakati Marekani ikikatiza jana msaada wa zaidi ya dola milioni 500 kwa taifa hilo la Niger. Marekani ilitangaza kuwa jeshi la Niger lilifanya mapinduzi mnamo Julai 26, na kuidondoa madarakani serikali ya kidemokrasia.
Soma pia: Blinken azungumza na Bazoum kwa njia ya simu
Msemaji wa wizara ya mambo ya nje wa Marekani Matthew Miller, amesema kurudishwa kwa msaada wa nchi yake kwa Niger, kutahitaji kuchukuliwa kwa hatua za kurejesha uongozi wa kidemokrasia katika muda wa haraka.