Katika taarifa yao ya hapo jana, waangalizi wa Umoja wa Ulaya walisema walishuhudia mabunda ya karatasi za kura zikiwa zimeshapigwa kwenye maeneo kumi tafauti.

Wasiwasi wa udanganyifu ulielezewa pia na Taasisi ya IRI ya Marekani, ambayo waangalizi wake wamekosowa jinsi uchaguzi huo ulivyofanyika.

Soma zaidi: Msumbiji yaanza kuhesabu kura

Kwa mujibu wa waangalizi hao, chama tawala cha Frelimo kilitumia vibaya rasilimali za nchi, wakiwemo wafanyakazi na vyombo vya usafiri vya umma, wakati wa kampeni. Kwenye majimbo yenye wafuasi wengi wa chama hicho, usajili wa wapigakura ulivuuka asilimia 100.

Waangalizi kutoka Jumuiya ya Madola wamezitaka mamlaka husika kuyashughulikia madai yote ya udanganyifu.

Ingawa matokeo rasmi hayatazamiwi kupatikana kabla ya wiki mbili zijazo, mgombea wa Frelimo, Daniel Chapo, anatarajiwa kushinda kwa wingi wa kura.