Waziri wa Mambo ya Nje wa China, Wang Yi, amesifu urafiki kati ya Afrika na nchi yake, akibainisha kuwa China ni mshirika wa kuaminika zaidi wa bara hilo. Wang Yi yuko katika ziara ya mataifa ya Afrika aliyoianzia nchini Namibia siku ya Jumatatu, ambapo atazuru pia Congo-Brazaville, Chad, na Nigeria.

Katika mkutano na waandishi wa habari uliofanyika mjini Windhoek, akiwa pamoja na Waziri Mkuu wa Namibia, Netumbo Nandi-Ndaitwah, Wang Yi alisisitiza kuwa ziara yake inalenga kuendeleza urafiki wa muda mrefu kati ya China na Afrika. Alisema:

 "Tunatumaini kwamba kwa kudumisha desturi ya kuitembelea Afrika kwanza mwanzoni mwa mwaka mpya, tunaweza kuonyesha ulimwengu kwamba bila kujali mabadiliko katika hali za kimataifa na kikanda, China itabaki kuwa rafiki wa kuaminika wa kaka na dada wa Afrika, mshirika wa kutegemewa zaidi katika juhudi za maendeleo na ustawi."

Soma pia: Rais Xi Jinping wa China ameahidi msaada wa dola bilioni 50 kwa Afrika

Hii ni mara ya 35 mfululizo ambapo Waziri wa Mambo ya Nje wa China ameifanya Afrika kuwa sehemu ya kwanza ya ziara zake za kidiplomasia mwanzoni mwa mwaka.

Wachambuzi wanatabiri kuwa ziara ya Wang Yi itafungua ukurasa mpya katika uhusiano wa China na Afrika, hasa kwa kuimarisha utekelezaji wa maazimio ya Mkutano wa Beijing wa Jukwaa la Ushirikiano wa China na Afrika (FOCAC) wa 2024.

Maoni ya Wachambuzi

Katika mahojiano na kituo cha China Global Television Network (CGTN), Cliff Mboya, mtafiti wa Kituo cha Mahusiano ya Kimataifa cha Afro-Sino, alieleza kuwa uhusiano kati ya China na Afrika umeendelea kuimarika kupitia uratibu wa mipango ya maendeleo. Alibainisha kuwa ziara ya Wang Yi itakuwa muhimu kwa utekelezaji wa mpango wa hatua wa 2025-2027:

"China inaendelea kuzingatia mipango ya muda mrefu ya maendeleo ya Afrika, ikijipanga na Ajenda 2063 ya Umoja wa Afrika. Kuna msisitizo juu ya maendeleo endelevu na ya kijani."

Rafael Obonyo, mchambuzi wa masuala ya vijana na sera za Afrika, aliongeza kuwa ziara hii inalenga kuimarisha mahusiano ya kiuchumi, hususan katika sekta ya miundombinu, ambayo China imechangia kwa kiwango kikubwa barani Afrika.

 Malengo na Maeneo ya Ushirikiano

Ziara ya mwaka huu inatarajiwa kuangazia masuala muhimu kama ushirikiano wa kiuchumi na kijamii, kuimarisha amani, utulivu, na maendeleo.

Namibia, Jamhuri ya Kongo, Chad, na Nigeria zina matumaini makubwa kwamba ushirikiano huu utaimarisha sekta muhimu kama vile miundombinu na maendeleo endelevu. Mao Ning, msemaji wa Wizara ya Mambo ya Nje ya China, alisema:

"Ziara ya Wang Yi inalenga kuendeleza utekelezaji wa matokeo ya Mkutano wa Beijing wa FOCAC, kuimarisha ushirikiano wa vitendo, na kukuza maendeleo endelevu na ya kina ya uhusiano kati yaChina na Afrika."

Ushindani wa Kidiplomasia

Ziara ya Wang Yi inakuja wakati ambapo mataifa makubwa yanashindana kwa ushawishi barani Afrika. Rais wa Marekani, Joe Biden, alizuru Angola mwanzoni mwa Desemba, akilenga kuimarisha mahusiano kati ya Washington na bara hilo katikati ya uwekezaji mkubwa wa China.

Hata hivyo, wachambuzi wanaamini kuwa urafiki wa muda mrefu na uwekezaji wa China barani Afrika unaipa nchi hiyo nafasi ya kipekee kama mshirika wa kipaumbele kwa maendeleo ya Afrika.

Soma pia: Kongamano la China- Afrika kuja na matokeo yenye tija?

Kwa muktadha huu, ziara ya Wang Yi inachukuliwa kuwa hatua muhimu katika kudumisha na kuimarisha ushirikiano wa kipekee kati ya China na Afrika. Pande zote mbili zinatarajiwa kuendeleza malengo yao ya pamoja ya maendeleo kwa ustawi wa kizazi kijacho.