Katika taarifa iliyotolewa jana na Wizara ya Mambo ya Nje, Kenya imeeleza kuwa shughuli za kuajiri wapiganaji kwa ajili ya vita nchini Ukraine zimepanuka na sasa zinawalenga raia kutoka mataifa mbalimbali ya Afrika, wakiwemo Wakenya.

Taarifa hiyo imebainisha kuwa zaidi ya Wakenya 200 tayari wamejiunga na jeshi la Urusi, na kwamba mitandao ya kuajiri wapiganaji hao bado inaendelea kufanya kazi ndani ya Kenya na Urusi.

Ubalozi wa Urusi mjini Nairobi haukujibu mara moja ombi la kutoa maoni kuhusu madai hayo.

Kwa mujibu wa wizara hiyo, ubalozi wa Kenya mjini Moscow umerekodi visa vya Wakenya waliojeruhiwa ambao walishawishiwa kujiunga na vita kwa ahadi ya kulipwa kiasi cha dola 18,000 kufidia gharama za visa, usafiri na malazi.

Wiki iliyopita, Ukraine iliripoti kuwa zaidi ya raia 1,400 kutoka takriban nchi 30 za Afrika wanapigania upande wa Urusi, baadhi yao wakiwa wameajiriwa kwa njia za udanganyifu.