Jumatano jioni, wakati mkutano wa huko Washington kati ya maafisa wa Marekani, Denmark, na Greenland ulimalizika bila suluhisho la "tofauti za kimsingi”kuhusu kisiwa hicho muhimu cha kimkakati cha Bahari ya Aktiki, Sweden, Norway, Ujerumani, Ufaransa, na Uingereza zilitangaza kupelekwa kwa vikosi vyao vya kijeshi kufuatia ombi la Denmark.

Rais wa Marekani Donald Trump ameelezea mara kwa mara nia yake ya kuichukua Greenland, eneo la Denmark lenye mamlaka ya ndani, ili kutumia rasilimali zake za madini na kuhakikisha usalama wa eneo la Aktiki, akitaja nia inayoongezeka kutoka Urusi na China.

Nini tunachokijua kuhusu askari wanaopelekwa?

Kulingana na Wizara ya Ulinzi ya Ujerumani, ndege ya usafiri ya Airbus A400M inapeleka timu ya upelelezi ya watu 13 kwenda Greenland siku ya Alhamisi.

Wizara hiyo ilisema operesheni hiyo, ambayo ilitokana na ombi la Denmark, inalenga kushirikiana na mataifa mengine ya Ulaya "kuchunguza mfumo wa michango inayowezekana ya kijeshi ili kuisaidia Denmark katika kuhakikisha usalama wa kikanda," kwa mfano, kwa uwezo wa ufuatiliaji wa baharini. Ujumbe huu umepangwa kuweko kisiwani humo hadi Jumamosi.

Kulingana na taarifa zao wenyewe, Norway itatuma wanajeshi wawili kwenda Greenland, huku Sweden ikituma maafisa kadhaa.

Katika ujumbe wa mtandao wa X, Rais wa Ufaransa Emmanuel Macron alitangaza kwamba Ufaransa itashiriki katika mazoezi ya pamoja ya kijeshi ya Aktiki ambayo Denmark inaandaa huko Greenland. Kulingana na ujumbe huyo, vikosi vya kwanza vya kijeshi vya Ufaransa tayari viko njiani, na vingine vitafuata.

Balozi wa Ufaransa nchini Poland, Olivier Poivre d'Arvor, aliambia shirika la habari la France Info kwamba kundi la kwanza la wanajeshi wa Ufaransa waliopelekwa Greenland lilijumuisha wataalamu wa maeneo ya milima wapatao 15. Wakati huo huo, Downing Street ilithibitisha kwamba, kutokana na ombi la Denmark, afisa wa jeshi la Uingereza ametumwa kujiunga na kikundi cha upelelezi kabla ya kuanza mazoezi yaliyopangwa.

Denmark yaimarisha ulinzi wa kijeshi huko Greenland

Kabla ya mkutano huko Washington Jumatano, Wizara ya Ulinzi ya Denmark ilitangaza kwamba Denmark itaongeza uwepo wake wa kijeshi huko Greenland "kuanzia leo."

Kulingana na taarifa ya wizara, ambayo haikutaja moja kwa moja Marekani, hii ni kujibu "mvutano wa siasa za kikanda" ambao haujatajwa ambao umeenea hadi Aktiki.

"Kuanzia leo, kutakuwa na uwepo mkubwa wa kijeshi ndani na karibu na Greenland - kwa ushirikiano wa karibu na washirika wa NATO," ilisema taarifa ya wizara. Taarifa hiyo ilielezea kwamba ndege zaidi, meli na wanajeshi, kutoka Denmark na kutoka kwa washirika wa NATO, watapelekwa Greenland.