Waziri wa mambo ya kigeni wa Marekani Bi Condoleezza Rice atalitembelea eneo la Darfur nchini Sudan wiki ijayo. Rais George W Bush ameamuru fedha zitolewe kuwasaidia wanajeshi wa umoja wa Afrika wanaolinda amani katika eneo la Darfur.

Msemaji wa Bi Rice,Sean McCormack, ametangaza kwamba Rice ataondoka mjini Washington siku ya Jumanne kwenda Sudan akiwa njiani kuelekea Senegal kuhudhuria mkutano kuhusu uchumi. Baadaye ataondoka Senegal kwenda mashariki ya kati kufuatia machafuko yanaoendelea kuongezeka katika eneo hilo.

Hapo awali Condoleezza Rice alimtaka waziri wa ulinzi wa Israel kufanya kila awezalo kuulinda mpango wa kuyaondoa makazi ya walowezi wa kiyahudi kutoka mkanda wa Gaza.