Wajumbe wa kundi la Hamas linalotawala Ukanda wa Gaza pamoja na wale wa Marekani wanatarajiwa kukutana na wasuluhishi wa Misri na Qatar kwa siku ya tatu ya mazungumzo kuhusu mkataba wa usitishaji mapigano kwa muda wa wiki sita.

Mkataba huo unajumuisha masharti ya kuachiwa raia wa Israel wanaoshikiliwa mateka kwa mabadilishano na wafungwa wa Kipalestina wanaozuiliwa kwenye magereza nchini Israel.

Kadhalika utahusisha upelekeaji msaada zaidi wa kiutu ndani ya Ukanda wa Gaza ambako inaarifiwa hali ya kibinadamu inazidi kuwa mbaya.

Hata hivyo Israel haishiriki mazungumzo hayo ya mjini Cairo licha ya shinikizo la kidiplomasia la kutaka yapatikane makubaliano ya kusitisha vita kabla ya kuanza mfungo wa mwezi wa Ramadhan mnamo wiki ijayo.