Watu 11 wamekufa baada ya kuvuta hewa ya gesi iliyovuja katika mji wa Ludhiana kwenye jimbo la Punjab kaskazini mwa India. Mbunge wa jimbo hilo ameeleza kuwa watu wengine tisa wamelazwa hospitalini kutokana na kadhia hiyo iliyotokea kwenye eno la viwanda. Kikosi cha kukabiliana na maafa nchini humo kipo kwenye eneo la tukio pamoja na wataalam wengine ili kutathmini chanzo kilichosababisha kuvuja kwa gesi hiyo. Maafisa wa polisi wanaendelea kupiga doria huku wakiwataka wenyeji kutosogelea eneo hilo. Waziri Mkuu wa jimbo la Punjab Bhagwant Mann amesema gesi hiyo ilivuja kutoka kiwandani lakini hakutoa maelezo zaidi.