Wanamgambo wa jihadi walianzisha mashambulizi siku ya Jumatano mchana na kuwalazimisha wakaazi kukimbilia msituni. Kwa mujibu wa mashirika ya haki za binaadamu na watu walioshuhudia, shambulizi hilo limetokea kwenye eneo la Palma karibu na eneo lenye mradi mkubwa wa gesi asilia kwenye jimbo la Cabo Delgado. Shirika la Habari la AP limeripoti kuwa mamia wengine wametafuta hifadhi kwenye kijiji cha Quitunda kilichoko karibu na eneo la mradi wa gesi.

Mashambulizi baada ya Total kutangaza kuanza kazi

Mashambulizi hayo yalitokea baada ya kampuni kubwa ya mafuta ya Ufaransa, Total kutangaza kwamba kazi itaanza tena. Total ni mwekezaji mkubwa katika mradi wa mafuta kwenye jimbo hilo, huku kukiwa na kampuni sita za kimataifa ikiwemo ExxonMobil.

Serikali ya Msumbiji imesema miongoni mwa watu waliozingirwa katika Hoteli ya Amarula ni pamoja na wafanyakazi wa kimataifa na vikosi vya usalama na kwamba operesheni za kuwaokoa zinaendelea. Mfanyakazi mmoja wa kampuni ya LNG amesema takriban mji wote umeharibiwa na watu wengi wameuawa. Hata hivyo hakufafanua zaidi kuhusu watu waliouawa wala uraia wao.

Shirika la kimataifa la kutetea haki za binaadamu, Human Rights Watch limesema washambuliaji wana mafungamano na kundi la Msumbiji la Al-Shabaab, ambalo lakini halina uhusiano wa moja kwa moja na kundi la jihadi la Somalia lenye jina kama hilo.

Watu kadhaa walioshuhudia wameiambia Human Rights Watch kwamba waliona miili ikiwa mitaani na wakaazi wakikimbia baada ya wapiganaji wa Al-Shabaab kuwafyatulia risasi watu na majengo. Tovuti ya Afrika Kusini ya News24 imeripoti kuwa raia mmoja wa Afrika Kusini ameuawa wakati wa shambulizi hilo.

Mfanyakazi mwingine kutoka kampuni inayoendeshwa na Total, ameliambia shirika la habari la Ufaransa, AFP kwamba awali helikopta ziliruka katika hoteli hiyo siku ya Ijumaa kujaribu kutafuta njia ya kuwaokoa watu wapatao 180 waliokwama ndani. ''Hatujui kama tutaokolewa na hoteli haina chakula, lakini bado kuna maji,'' alifafanua mfanyakazi huyo.

Serikali yathibitisha mashambulizi

Serikali ya Msumbiji imethibitisha kutokea kwa shambulizi hilo na imesema wanajeshi wameanzisha operesheni ya kupambana na wapiganaji kwenye mji huo. Msemaji wa Wizara ya Ulinzi, Kanali Omar Saranga amesema vikosi vya ulinzi na usalama vinafanya kazi usiku na mchana kurejsha usalama haraka iwezekanavyo kwa watu wa eneo hilo pamoja na miradi ya kiuchumi karibu na eneo hilo.

Taarifa iliyotolewa Ijumaa na Ubalozi wa Marekani mjini Maputo, imelaani vikali shambulizi hilo la Palma na umeahidi kushirikiana na serikali ya Msumbiji kupambana na ugaidi.

Wanamgambo wa Al-Shabab wamekuwa wakivamia vijiji na miji kulizunguka jimbo la Cabo Delgado, na kusababisha karibu ya watu 700,000 kuyakimbia makaazi yao. Kwa mujibu wa shirika la Marekani linalokusanya takwimu kwenye maeneo yenye migogoro na makundi yenye silaha ACLED, mashambulizi hayo yamesababisha mauaji ya watu wapatao 2,600, nusu ya hao wakiwa raia.

(AFP, AP)