Ofisi ya Umoja wa Mataifa nchini Nigeria, imesema watu 200 wengi wao wanawake na watoto waliopoteza makaazi yao kufuatia ghasia kaskazini mashariki mwa Nigeria, wametekwa nyara na kundi la Boko Haramwalipokuwa wanatafuta kuni karibu na mpaka wa Chad.

Waathiriwa hao walikuwa wamezunguka katika kambi kadhaa wakitafuta kuni katika jimbo la Borno, wakati walipovamiwa na kutekwa. Mratibu wa Umoja wa Mataifa nchini Nigeria, Mohammed Fall, amesema iIdadi kamili ya watu waliotekwa hadi sasa bado haijajulikana lakini inakadiriwa kufika 200.

Kisa hicho kinasemekana kutokea siku kadhaa zilizopita lakini taarifa zake zimetolewa leo kufuatia kudhibitiwa kwa mawasiliano katika eneo la Gamboru.

Fall amesema licha ya kutolewa taarifa ya kuachiwa kwa kinamama wazee na watoto walio chini ya miaka 10, bado kuna idadi kubwa ya watu hawajulikani waliko.