Kupitia mtandao wa Facebook, kamandi ya kijeshi ya Kusini mwa Ukraine imeandika kuwa vifusi kutoka kwa ndege isiyo na rubani ya Urusi iliyodunguliwa na jeshi la anga la Ukraine, vilianguka ndani ya jengo la ghorofa nyingi na kuwaka moto. Raia watatu waliuawa katika moto huo na wengine 26 kujeruhiwa.

Ndege 20 zisizokuwa na rubani za Iran zadunguliwa

Wakati huohuo,  jeshi la anga la Ukraine limesema kuwa Urusi imeelekeza ndege 35 zisizokuwa na rubani na makombora manane katika malengo nchini Ukraine. Jeshi hilo limeongeza kuwa ndege 20 za Iran zisizokuwa na rubani aina ya Shaheed zilidunguliwa pamoja na makombora mawili.

Jeshi hilo limeendelea kusema kuwa mbali na Odessa, mashambulizi hayo ya Urusi pia yalikuwa yameelekezwa dhidi ya malengo katika maeneo ya Poltava na Kharkiv.