Wawakilishi wa Rwanda, Kongo wakutana
27 Julai 2023![Demokratische Republik Kongo | Hilfsprojekt für Frauen](https://static.dw.com/image/65901829_800.webp)
Zaidi ya miongo mitatu tangu kuzuka tena kwa migogoro na mivutano ya kikabila na kisiasa ambayo imevuruga uhusiano wa kijamii kati ya Rwanda na jirani yake, Jamhuri ya Kidemokrasia ya Kongo, wawakilishi wa kijamii na wafanyabiashara wamekutana kutoka miji ya Rubavu na Goma kujadiliana njia za kupambana na athari za mizozo iliyopo upande wa mashariki mwa Kongo.
Soma zaidi: Unyanyasaji wa kingono waongezeka mjini Goma, DRC
Serge Bisimwa, mratibu wa kampuni ya Benevolencia Grands Lacs iliyoandaa mikutano hii, aliiambia DW kwamba matokeo ya uhasama wa kisiasa baina ya nchi zao yanaendelea kuathiri idadi kubwa ya watu.
"Kuibuka tena kwa kundi la waasi wa M23 kumezidisha hali hiyo. Suala la vita mashariki mwa Kongo linapaswa kuachwa kwa wanasiasa wa nchi hizi mbili." Alisema Bisimwa.
Umuhimu wa kuhubiri amani
Ngoma King wa shirika la kiraia la Rwanda lililowakilishwa katika mikutano hii alisema njia pekee ya kuondokana na mgogoro wa kijamii kati ya nchi hizo mbili zinazopakana ni kuwepo kwa amani na hotuba za kuhubiri amani na upendo.
Miongoni mwa mapendekezo yaliyotolewa na kupitishwa kwa kauli moja na washiriki wa mkutano huu ni kujitolea kuhubiri amani na kuishi pamoja.
Soma zaidi: Maporomoko ya ardhi yaua watu 10, DRC
Juhudi nyingi zinafanywa kati ya Kongo na Rwanda kuwaleta watu wa nchi hizo mbili kuishi kwa pamoja, huku kwa Wakongo wengine wakithibitisha kuwa kurejea katika kuishi pamoja kwa amani ni jambo lisilowezekana maadamu uasi wa M23 unaendelea kupamba moto nchini humo.
Mara nyingi Kinshasa inaituhumu Rwanda kwa kuwaunga mkono M23 tuhuma ambazo zinakanushwa na Kigali.
Imeandaliwa na Ruth Alonga/DW Goma