نيوز ايجنسی ڈی پی اے کی مصری دارالحکومت قاہرہ سے موصولہ رپورٹوں کے مطابق القاعدہ کی مرکزی کمان کی جانب سے پير کے روز جاری کردہ ايک آن لائن پيغام ميں يہ دعوی کيا گيا ہے کہ شام ميں فعال تنظيم اسلامی رياست برائے عراق اور شام کے ساتھ اُس کا کوئی تعلق نہيں ہے۔ اِس بيان ميں کہا گيا ہے کہ القاعدہ پر اِس تنظيم کی کارروائيوں کی ذمہ داری عائد نہيں ہوتی۔ بيان ميں مزيد کہا گيا، ’’ہميں نہ تو اِس گروہ کے قيام کے بارے ميں مطلع کيا گيا اور نہ ہی ہم سے کسی قسم کی کوئی مشاورت کی گئی تھی۔‘‘

اسلامی رياست برائے عراق کے سربراہ ابو بکر البغدادی نے اپريل 2013ء ميں اس گروہ يعنی اسلامی رياست برائے عراق و شام کے قيام کا اعلان کيا تھا۔ اُس وقت کے بعد سے القاعدہ کا يہ دوسرا اِسی طرز کا پيغام ہے۔ اِس سے قبل گزشتہ برس جون ميں القاعدہ کے رہنما ايمن الظواہری نے البغدادی ہی کی جانب سے بنائی جانے والی ايک اور تنظيم النصرا فرنٹ کے ساتھ تعلق کا اظہار کرتے ہوئے کہا تھا کہ يہ گروہ شام ميں اپنی کارروائياں جاری رکھے۔ الظواہری نے ’اسلامی رياست برائے عراق و شام‘ کے نام تلے اِن دونوں گروہوں کے اشتراک کو مسترد کر ديا تھا۔

واضح رہے کہ النصرا فرنٹ نے بھی اسلامی رياست برائے عراق و شام اور اُس کے مخالفين کے مابين تصادم سے مکمل لا تعلقی کا اظہار کيا تھا اور اطلاعات ہيں کہ ماضی ميں اِس گروہ کی جانب سے فريقين کے درميان جنگ بندی کی کوششيں بھی کی جا چکی ہيں۔ تاہم اتوار کے روز شمالی صوبے حلب ميں اُس حملے کے بعد، جِس ميں اسلامک فرنٹ نامی ايک اور اتحاد کے سولہ جنگجو ہلاک ہو گئے تھے، النصرا فرنٹ نے اعلان کيا کہ اسلامی رياست برائے عراق و شام کے ساتھ اختلافات دور کرنے کی تمام کوششيں ناکام ہو چکی ہيں۔

اِس حوالے سے بات کرتے ہوئے النصرا فرنٹ کے ايک کمانڈر معا الہمساوی نے نيوز ايجنسی ڈی پی اے کو بتايا، ’’آج اسلامی رياست برائے عراق و شام نے صدر بشار الاسد کے خلاف لڑنے والے تمام مسلح گروپوں کو يہ واضح پيغام دے ديا ہے کہ وہ مکالمت يا مسلم امہ کے وسيع تر مفادات ميں کوئی دلچسپی نہيں رکھتے۔‘‘

واضح رہے کہ اتوار کے روز حلب ميں کيے جانے والے حملے ميں جِس مقام کو نشانہ بنايا گيا تھا، باغی ذرائع کے مطابق وہاں شام ميں فعال متعدد مخالف دھڑوں کے مابين اختلافات دور کرنے کے سلسلے ميں مذاکرات کا عمل جاری تھا۔

شام ميں جاری خانہ جنگی انتہائی پيچدہ ہو چکی ہے اور وہاں فعال اعتدال پسند شامی باغيوں کو کئی اسلامی شدت پسند گروہوں کا سامنا ہے۔ يہ گروہ صدر اسد کا تختہ الٹ کر وہاں اسلامی رياست کے قيام کے خواہاں ہيں۔

دريں اثناء لندن ميں قائم سيريئن آبزرويٹری فار ہيومن رائٹس کے مطابق شام ميں مارچ 2011ء سے شروع ہونے والی حکومت مخالف تحريک ميں اب تک ايک لاکھ تيس ہزار سے زائد افراد ہلاک ہو چکے ہيں۔ قريب تين برس سے جاری اِس خانہ جنگی ميں اب تک کا سب سے خونريز مہينہ جنوری 2014ء تھا، جِس ميں کُل 5,794 ہلاکتيں رپورٹ کی گئيں۔ آبزرويٹری کے مطابق گزشتہ ماہ ہلاک ہونے والوں ميں 358 بچے اور 1,732 ايسے عام شہری بھی شامل ہيں، جِن کا لڑائی سے کوئی تعلق نہيں تھا۔

اقوام متحدہ کی ايجنسيوں کے مطابق شام کے 2.4 ملين شہری ملک سے نقل مکانی کر چکے ہيں جبکہ ملک ميں موجود قريب ساڑھے چھ ملين لوگ بے گھر ہو چکے ہيں۔