آئی فون بنانے والی مشہور امریکی کمپنی ایپل اب رواں برس سے بھارت میں بھی اپنے فونز کی تیاری شروع کر دے گی۔ بھارتی حکام کے مطابق ایپل کمپنی اپنے آئی فونز کو بھارت میں اسمبل کرنے پر تیار ہو گئی ہے۔
تصویر: Reuters/S. Andrade
اشتہار
خبر رساں ادارے اے ایف پی نے بھارتی ریاست کرناٹک کے انفارمیشن ٹیکنالوجی اور بائیو ٹیکنالوجی کے وزیر پریانک گھڑگے کے حوالے سے تین فروری بروز جمعہ بتایا ہے کہ ایپل کمپنی نے بھارت میں اپنے آئی فونز کی تیاری پر رضا مندی ظاہر کر دی ہے اور آئندہ کچھ مہینوں میں اس حوالے سے عملی کام شروع کر دیا جائے گا۔ ناقدین کا کہنا ہے کہ ایپل کمپنی اس طرح بھارت میں بسنے والے ایک بڑے متوسط طبقے کو اپنی اس پراڈکٹ کی طرف مبذول کرانا چاہتی ہے۔
یہ امر اہم ہے کہ چین میں آئی فونز کی فروخت کی شرح میں کمی واقع ہوئی ہے اور اب ایپل اپنے آئی فونز کو بڑے پیمانے پر فروخت کرنے کے حوالے سے ایک نئی بڑی منڈی کی تلاش میں ہے۔ اپیل نے ابھی تک بھارت میں اپنے آئی فونز کی پروڈکشن شروع کرنے کے حوالے سے کوئی بیان جاری نہیں کیا ہے۔ بھارت میں اس وقت جنوبی کوریائی سام سانگ کمپنی کے اسمارٹ فونز کی بڑی مانگ ہے۔
ایپل کے چیف ایگزیکٹیو ٹم کک نے رواں ہفتے ہی کہا تھا کہ وہ سوا ارب کی آبادی والے ملک بھارت میں ’بڑے پیمانے پر سرمایہ کاری‘ پر غور کر رہے ہیں۔ کرناٹک کے انفارمیشن ٹیکنالوجی اور بائیو ٹیکنالوجی کے وزیر پریانک گھڑگے کے بقول رواں برس اپریل کے اواخر سے آئی فونز کی بنگلور میں پروڈکشن کا عمل شروع ہو سکتا ہے۔ انہوں نے کہا کہ بھارت میں اسمبل کیے جانے والے آئی فونز دراصل بھارتی مارکیٹ کے لیے ہی ہوں گے۔
آئی فون دس برس میں کہاں سے کہاں پہنچ گیا
دس سال پہلے آئی فون متعارف کرایا گیا، تو یہ ایک بڑی پیش رفت تھی، مگر صرف ایک دہائی میں یہ فون جدت کی انتہاؤں کو چھونے لگا ہے۔ اب آئی فون کے پرانے ماڈلز واقعی پرانے لگنے لگے ہیں۔
تصویر: DW/M.Bösch
اصل آئی فون
نو جولائی سن 2007ء کو اسٹیو جابز نے پہلی مرتبہ آئی فون متعارف کروایا تھا۔ یہ فون اچھا ہے، مگر آج کی نگاہ سے دیکھا جائے، تو شاید اس فون کو کوئی نہ خریدے۔ بعض ماہرین تو اسے ’پرانی اینٹ‘ کہتے ہیں۔
تصویر: picture alliance/AP Images/P. Sakuma
انتہائی سست رفتار
پہلا آئی فون ’اَیج‘ کہلانے والی ڈیٹا ٹرانسمیشن ٹیکنالوجی سے چلتا تھا۔ یہ ٹو جی وائرلیس ورژن تھا۔ یہ بہت سست رفتار سے کام کرتا تھا یعنی پانچ میگابائٹ کی فائل بھیجنے کے لیے آپ کو قریب آٹھ منٹ درکار ہوتے تھے۔ آج کا آئی فون یہ فائل صرف چار سیکنڈ میں ارسال کر دیتا ہے۔
تصویر: picture-alliance/dpa/Apple
کوئی ایپ اسٹور تک نہیں
جب پہلا آئی فون آیا، تو اس وقت کوئی ایپ اسٹور بھی نہیں تھا۔ ایپ اسٹور آئی ٹیونز سے اَپ ڈیٹ کر کے سن 2008ء میں اس وقت متعارف کروایا گیا، جب اسٹیو جابز اس بات پر رضامند ہوئے کہ صارفین اس سافٹ ویئر پلیٹ فارم کو استعمال کرتے ہوئے اپنے اپنے سمارٹ فون کو انفرادی رنگ دے سکتے ہیں۔
تصویر: picture-alliance/dpa/F. Duenzl
ٹیسٹ میسج میں تصویر نہیں
سن 2007ء میں آئی فون کسی لفظی پیغام کے ساتھ تصویر بھیجنے کی صلاحیت کا حامل نہیں تھا۔ ایپل کا آج کا آئی میسیج صارفین کو صرف ٹیکسٹ میسیجز ہی نہیں بلکہ تصاویر، ویڈیوز، کانٹیکٹ معلومات اور بہت سی دیگر چیزیں بھیجے کی بھی اجازت دیتا ہے۔
تصویر: Fotolia/Pavel Ignatov
صرف تصویر کھینچیے
آئی فون کی پہلی جنریشن میں کیمرے بھی کمزور تھے۔ ان میں دو میگا پکسل کا کیمرہ ہوتا تھا، جو ویڈیو بھی نہیں بنا سکتا تھا۔ اب آئی فون سیون میں اعلیٰ معیار کی تصاویر اور ویڈیوز بنانا ایک نہایت عام سی بات ہے۔
تصویر: Reuters/B. Diefenbach
کم فیچرز
سن 2007 میں آئی فون کا نوٹیفیکشن سینٹر بھی نہیں تھا۔ سری اور پرسنل ڈیجیٹل معاون بھی نہیں تھا اور راستے بتانے والا اَیپ بھی نہیں۔ یہ سب صرف جدید آئی فونز کا ہی حصہ ہیں۔
تصویر: picture-alliance/dpa/H. H. Young
تیز رفتار ارتقاء
نئے آئی فونز میں وہ بہت سی سہولتیں موجود ہیں، جن کا کسی دور میں صرف خواب ہی دیکھا جاتا تھا۔ پچھلے برس کی تیسری سہ ماہی میں ایپل کی فروخت میں پانچ اعشاریہ تین فیصد کمی ہوئی، اس کا مطلب یہ ہے کہ آئی فونز کو ابھی اور بھی جدید بنانے کی گنجائش موجود ہے۔
تصویر: Reuters/B. Diefenbach
7 تصاویر1 | 7
نیوز ایجنسی اے ایف پی نے ریسرچ فرم Canalys کے اعداد و شمار کے حوالے سے بتایا ہے کہ بھارت میں موبائل فونز کی منڈی میں ایپل کمپنی کا حصہ صرف دو فیصد بنتا ہے جبکہ اس کے مقابلے میں اس کی حریف کمپنی سام سانگ کا حصہ تئیس فیصد ہے۔
ابھی تک یہ واضح نہیں ہے کہ آیا بھارت میں آئی فونز کی تیاری سے مقامی سطح پر اس کی مقبولیت میں واقعی اضافہ ہو سکے گا تاہم ماہرین کا کہنا ہے کہ اگر یہ اسمارٹ فونز بھارت میں تیار کیے جائیں گے تو اس سے کمپنی کے اخراجات میں کمی ہو گی اور یوں بھارت میں یہ کم داموں پر دستیاب ہو سکیں گے۔ اس طرح امکان ہے کہ بھارت میں آئی فونز کی مانگ بڑھ سکتی ہے۔
