بلومبرگ نیوز نے نئے آئی فون کے بارے میں معلومات رکھنے والے دو اشخاص کے حوالے سے بتایا ہے کہ ایپل کی جانب سے نیکسٹ جنریشن آئی فون میں ڈیٹا پروسیسنگ کے لیے ’اے فائیو‘ پروسیسر موجود ہوگا۔ یہ وہی پروسیسر ہے جو رواں برس متعارف کرائے جانے والے آئی پیڈ ٹو میں نصب ہے۔

اطلاعات کے مطابق آئی فون فائیو میں زیادہ بہتر تصاویر اور ویڈیو کے لیے آٹھ میگا پکسل کا کیمرہ نصب ہوگا۔ یاد رہے کہ آئی فون فور میں پانچ میگا پکسل کا کیمرہ موجود ہے۔ تاہم ان اطلاعات کے بارے میں براہ راست ایپل کی طرف سے کوئی ردعمل ظاہر نہیں کیا گیا ہے، کیونکہ ایپل کی یہ تاریخ رہی ہے کہ اس کی جانب سے نئی مصنوعات باقاعدہ طور متعارف کرانے سے قبل تک ان کے بارے میں معلومات کو عام نہیں کیا جاتا۔

دوسری طرف یہ بھی اطلاعات ہیں کہ معروف کمپیوٹر ساز امریکی ادارے ایپل کی طرف سے آئی پیڈ کے نئے ورژن کی بھی جانچ پڑتال جاری ہے۔ اس نئے آئی پیڈ میں اسکرین کی ریزولوشن زیادہ بہتر کی گئی ہے۔ اب اس میں وہی اسکرین فراہم کی جائے گی جو اس وقت آئی فون فور میں نصب ہے۔

بلومبرگ نیوز کے مطابق زیادہ تیز رفتار اور طاقتور پروسیسر کی بدولت ایپل اس میدان میں اپنی حریف کمپنیوں مثلاﹰ سامسنگ وغیرہ پر اپنی سبقت برقرار رکھنا چاہتا ہے۔ سام سنگ کی طرف سے تیار کردہ تیز رفتار پروسیسر والے اسمارٹ فونز گوگل کے اینڈرائڈ آپریٹنگ سسٹم پر کام کرتے ہیں۔ اخبار کے مطابق نئے آئی فون کی ریلیز ستمبر میں کی جائے گی اور قریب اسی وقت ایپل کی طرف سے اپنا نیا آپریٹنگ سسٹم ’آئی او ایس فائیو‘ بھی متعارف کرایا جانا ہے، جس کا کوڈ نام ’ٹیلو رائڈ‘ رکھا گیا ہے۔

ایپل اور گوگل کی بدولت بلیک بیری بنانے والی کمپنی آر آئی ایم کا مارکیٹ شیئر پہلے ہی کافی نیچے آچکا ہے۔ کینیڈا سے تعلق رکھنے والی ریسرچ ان موشن کمپنی کی طرف سے منافعے اور فروخت کے اہداف پورے نہ ہونے کی وجہ سے اپنے اسٹاف میں کمی کا اعلان کیا جاچکا ہے۔

اسمارٹ فونز اور ٹیکنالوجی کے بارے میں مارکیٹ ریسرچ کمپنی ’آئی ڈی سی‘ کے مطابق اسمارٹ فونز کی بین الاقوامی مارکیٹ میں رواں برس ایپل کا شیئر 18.2 فیصد تک پہنچنے کی توقع ہے۔ دوسری طرف گوگل کا اینڈرائڈ آپریٹنگ سسٹم رکھنے والے اسمارٹ فونز کا مارکیٹ شیئر 38.9 فیصد تک پہنچ جائے گا۔

رپورٹ: افسر اعوان

ادارت: شامل شمس