ایک تازہ بیان میں شیوراج سنگھ چوہان نے کہا کہ آئی پی ایل کھیل نہیں بلکہ ایک تماشہ ہے اور اب اس پر اسپاٹ فکسنگ اسکینڈل کا داغ بھی لگ گیا ہے۔ ان کے بقول یہ کرکٹ کے وسیع تر مفاد میں ہوگا اگر اس ٹورنامنٹ پر پابندی عائد کر دی جائے۔ اُن سے قبل بھارتی سیاسی جماعت جنتا دل نے بھی کہہ دیا تھا کہ آئی پی ایل کا ہر ایک سیزن اسکینڈل سے بھرا ہوتا ہے۔ اس پارٹی کے رہنما شرد یادیو کے بقول، ’’انسان یعنی کھلاڑیوں کا نیلام کیا جاتا ہے، آئی پی ایل کا شروع سے ہی مقصد محض پسہ کمانا تھا، کھیل کا فروغ نہیں۔‘‘

آئی پی ایل کے رواں سیزن میں تین کھلاڑیوں، جن میں بھارتی فاسٹ باؤلر سری شانت بھی شامل ہیں، پر اسپاٹ فکسنگ کا الزام لگا ہے۔ اس معاملے کی تازہ پیشرفت یہ ہے کہ ممبئی پولیس کے کرائم برانچ نے مزید تفتیش کے لیے سری شانت کو تحویل میں رکھنے کا عندیہ دیا ہے۔

جوائنٹ کمشنر ہمانشو رائے نے گزشتہ روز کہا کہ بدھ کو ممبئی میں سری شانت کی گرفتاری کے بعد اس کے کمرے سے قبضے میں لیے گئے کمپیوٹر، موبائل فون اور آئی پیڈ وغیرہ کی جانچ پڑتال کی جارہی ہے۔

یاد رہے کہ کرائم برانچ نے راجھستان رائلز کے دو کھلاڑیوں اور تین سٹہ بازوں کو بھی حراست میں لے رکھا ہے۔ ہمانشو رائے کے بقول پولیس معاملے کی تہہ تک پہنچنا چاہتی ہے۔ پولیس کے مطابق تیرہ مئی کو سری شانت ہوٹل کے کمرے میں منتقل ہوئے اور اس کے بعد ان سے ملنے والوں کے بارے میں معلومات حاصل کرنے کے لیے ہوٹل کی سی سی ٹی وی فوٹیج بھی حاصل کی جارہی ہے۔

(sks/ ia (PTI