بھارت کے مقامی میڈیا پر نشرکردہ ایک ویڈیو میں دیکھا جا سکتا ہے کہ آتش بازی کی ایک فیکڑی میں دھماکے کے بعد دھواں آسمان کی طرف اٹھ رہا ہے۔ 

طبی حکام کی طرف سے سات ہلاکتوں کی اطلاع دی گئی ہے۔ مقامی حکام کے مطابق درجنوں ایمبولینس جائے حادثہ کی طرف بھیج دی گئی ہیں جبکہ زخمیوں کو بچانے کے لیے فوجی ہیلی کاپٹروں کو بلایا گیا ہے۔ حکام کی طرف سے ہلاکتوں میں اضافے کا خدشہ ظاہر کیا جا رہا ہے۔

بھارتی ریاست مدھیہ پردیش کے ضلع ہردا کے ایک ہسپتال کے ملازم نے نام نہ ظاہر کرنے کی شرط پر بتایا ہے، ''ابھی تک ہم سات ہلاکتوں کی تصدیق کر سکتے ہیں۔‘‘ اس اہلکار کا مزید کہنا تھا، ''یہاں 65 زخمیوں کو لایا گیا ہے اور 10 زخمیوں کو ہم نے بڑے ہسپتال بھیج دیا ہے۔‘‘

امدادی کارروائیوں کی نگرانی کرنے والے اہلکار کیلاش چند پارٹے کے مطابق آگ شدید ہے اور 15 گاڑیاں آگ بجھانے کی کارروائی میں مصروف ہیں۔ پارٹے کا نیوز ایجنسی اے ایف پی سے گفتگو کرتے ہوئے کہنا تھا، ''کم از کم آٹھ افراد شدید زخمی ہیں۔ ہم یہاں سائٹ پر موجود ہیں اور امدادی کارروائیوں کے ساتھ ساتھ لوگوں کو ہسپتالوں میں بھیج رہے ہیں۔ اس لیے ہم فوری طور پر ہلاکتوں کی تعداد کی تصدیق نہیں کر سکتے۔‘‘

 ان کا مزید کہنا تھا، ''ہم ابھی تک 70 سے 75 زخمیوں کو بچانے میں کامیاب رہے ہیں۔ ان تمام کو مقامی ہسپتالوں میں منتقل کیا جا رہا ہے۔‘‘

تھائی لینڈ آتش بازی کے کارخانے میں دھماکہ تئیس مزدور ہلاک

انہوں نے بتایا کہ فیکٹری میں 200 سے 300 کے قریب لوگ کام کرتے تھے تاہم یہ معلوم نہیں ہو سکا کہ دھماکے کے وقت وہاں کتنے لوگ موجود تھے؟

جس کمپلیکس میں دھماکہ ہوا، اس کے اردگرد کم از کم 10 عمارتوں کو دھماکے کی شدت سے نقصان پہنچا ہے۔

بھارت میں آتش بازی کا سامان تیار کرنے والی سینکڑوں غیرقانونی فیکڑیاں موجود ہیں اور ناقص حفاظتی اقدامات کی وجہ سے ہر سال ایسی کئی فیکڑیوں میں دھماکے ہوتے رہتے ہیں۔

مدھیہ پردیش کے وزیر اعلیٰ موہن یادیو نے اسے ایک ''انتہائی افسوسناک خبر‘‘ قرار دیتے ہوئے قریبی ہسپتالوں کے برن یونٹس کو زخمیوں کے علاج معالجے کے لیے تیار رہنے کا حکم دیا ہے۔

انہوں نے مزید کہا کہ کم از کم 20 ایمبولینس جائے وقوعہ پر موجود ہیں، جبکہ زخمیوں کی مدد کے لیے مزید 50 ایمبولینس روانہ کی جا رہی ہیں۔

ا ا/ا ب ا (اے ایف پی)