جرمن صدر فرانک والٹر شٹائن مائر نے کرسمس کے اپنے پیغام میں شہریوں سے جمہوریت کا دفاع کرنے کی درخواست کی ہے۔ ان کا یہ پیغام کل بدھ کے روز نشر کیا جائے گا۔ جرمن صدر نے مزید کہا کہ مشرقی اور مغربی جرمنی کے انضمام کو تین دہائیاں گزر چکی ہیں اور عوام جمہوریت میں اتحاد اور آزادی کے ساتھ رہ رہے ہیں۔

تاہم اس موقع پر شٹائن مائر نے اس صورتحال کا ناجائز فائدہ اٹھانے سے خبردار بھی کیا،'' کبھی یہ ذہن میں مت لائیے گا کہ یہ غیر اہم ہے۔ ہمیں جمہوریت کی ضرورت ہے لیکن اس وقت جمہوریت کو ہماری ضرورت ہے۔‘‘ جرمن صدر کے طور پر یہ قوم سے ان کا تیسرا خطاب تھا۔ اپنے خطاب میں انہوں نے داخلی سیاست اور جرمن معاشرے پر ہی اپنی توجہ مرکوز کی۔

 انہوں نے مزید کہا،''ہماری جمہوریت کو خود اعتماد شہریوں کی ضرورت ہے، جو پر اعتماد ہوں، جو اس نظام کی پاسداری کر سکتے ہوں، عقل اور شائستگی کے ساتھ اور جو دوسروں سے یکجہتی کا اظہار کر سکتے ہوں۔‘‘ شائن مائر کے بقول ،''مجھے علم ہے کہ یہ خصوصیات آپ میں اور ہم میں موجود ہیں، اس معاشرے میں بھی پائی جاتی ہیں۔ یہی وجہ ہے کہ مجھے 'ہم‘ پر بھروسہ ہے۔ اپنے ملک پر بھروسہ ہے۔‘‘

شٹائن مائرنے دو ماہ قبل مشرقی شہر ہالے میں ہوئے دہشت گردانہ حملے کے بارے میں بھی بات کی۔ انہوں نے کہا '' 2019ء  کی  چند تصاویر نےمجھ پر گہرا اثر چھوڑا تھا۔ اُس وقت ایک سیناگوگ  یعنی یہودی معبد کے مضبوط اور بھاری بھرکم دروازے پر ہونے والے حملے کے نتیجے میں اس کے دروازے پر کم از کم گولیوں کے بیس نشانات تھے اور کوئی معجزہ ہی تھا کہ وہ اپنی جگہ پر موجود تھا۔ یہ ہمارے لیے ایک پیغام بھی ہے کہ کیا ہم مضبوط ہیں؟ کیا ہم اپنا دفاع کر سکتے ہیں؟ کیا ہم ایک دوسرے کے ساتھ کندھا ملا کر کھڑے ہیں؟ کیا ہم ایک دوسرے کے لیے کھڑے ہوتے ہیں؟‘‘

اس موقع پر جرمن صدر نے احتجاج کے حق کو جرمنی میں بنیادی آزادی سے تعبیر کیا اور شہریوں سے سیاسی میدان میں مزید متحرک ہونے کے لیے کہا،'' آپ جمہوریت کا حصہ ہیں۔ اپنا ووٹ ڈالتے وقت، سیاسی میدان میں فعال ہوتے ہوئے، سڑکوں پر احتجاج کے دوران، یا کسی سیاسی جماعت کی حمایت کرتے ہوئے یا پھر مقامی کونسلر کے طور پر۔ مختصراً جرمنی کا ایک حصہ آپ کے ہاتھوں میں بھی ہے۔‘‘

شٹائن مائر نے پہلی مرتبہ کرسمس کے اپنے خطاب میں بائبل کے الفاظ استعمال کیے 'پریشانی کی ضرورت نہیں‘‘۔ ساتھ ہی انہوں نے نئے سال کے لیے تمام لوگوں کے لیے ہمت اور اعتماد و یقین کی خواہشات کا اظہار بھی کیا ہے۔

ع ا  /  ک م  ( ڈی ڈبلیو)