اس میچ میں ناکامی کے باوجود پاکستان نے یہ سیریز دو کے مقابلے میں تین میچوں سے جیت لی ہے۔ اتوار کے دن ہمبنتوتا کے مقام پر کھیلے گئے اس آخری میچ میں سری لنکا نے ٹاس جیت کر پہلے کھیلنے کا فیصلہ کیا اور عمدہ کارکردگی کا مظاہرہ کرتے ہوئے چار کھلاڑیوں کے نقصان پر 368 رنز بنا ڈالے۔ جس کے جواب میں پاکستان کی تمام ٹیم اڑتیسویں اوور میں 203 کے اسکور پر ہی ڈھیر ہو گئی۔

اس میچ کی اہم بات سری لنکن اوپنر کوشل پیریرا کی شاندار سنچری رہی۔ انہوں نے مخصوص انداز میں جارحانہ بلے بازی کرتے ہوئے 166 رنز بنائے اور رن آؤٹ ہوئے۔

پیریرا اور دلشان نے پہلی وکٹ کی شراکت میں 164 رنز کی شراکت داری کی اور یوں سری لنکا کو ایک مضبوط بنیاد فراہم کی۔ دلشان نے اپنی محتاط اننگز میں باسٹھ رنز بنائے۔ اس طرح وہ ایک روزہ میچوں میں دس ہزار سے زیادہ رنز بنانے والے کھلاڑی بن گئے ہیں۔

سری لنکن بلے باز اس سیریز میں شکست کے باوجود اس آخری میچ میں تازہ دم نظر آئے اور انہوں نے پاکستانی بولرز کو سنبھلنے کا موقع ہی نہ دیا۔ یہ اس سیریز کا پہلا میچ تھا، جس میں پاکستانی بولرز کوئی خاص کارکردگی کا مظاہرہ نہ کر سکے۔

سری لنکن کپتان اینجلوز میتھیوز نے بھی شاندار بلے بازی کی اور 70 رنز کی ناقابل شکست اننگز کھیلی۔ آخری اوورز میں میتھیوز کے ساتھ سری وردنا نے بھی شاندار اسٹروکس کھیلے اور وہ باون کے انفرادی اسکور پر ناٹ آؤٹ رہے۔

پاکستان کی طرف سے راحت علی واحد بولر تھے جنہوں نے وکٹ حاصل کی۔ انہوں نے دس اوورز میں 74 رنز دے کر دو کھلاڑیوں کو آؤٹ کیا جبکہ سری لنکا کے دو کھلاڑی رن آؤٹ ہوئے۔

پاکستان نے جب ایک پہاڑ جیسے ہدف کا تعاقب شروع کیا تو سری لنکن بولرز نے انہیں کھل کر نہ کھیلنے دیا۔ پاکستان کی پہلی وکٹ اکاون رنز پر اُس وقت گری جب احمد شہزاد سنانائیکا کی ایک گیند پر اسٹمپ ہو گئے۔

اس کے بعد کپتان اظہر علی رن آؤٹ ہو گئے اور بعد ازاں تمام کھلاڑی وقفے وفقے سے پویلین کی طرف لوٹتے رہے۔ پاکستان کی طرف سے نمایاں بلے باز محمد حفیظ رہے، جنہوں نے 37 رنز بنائے۔

سری لنکا کی طرف سے سنانائیکا نے تین جبکہ پیریرا نے دو کھلاڑیوں کو آؤٹ کیا۔ میچ کا بہترین کھلاڑی کوشل پیریرا کو قرار دیا گیا۔

اب پاکستان اور سری لنکا کی ٹیمیں دو ٹوئنٹی ٹوئنٹی میچوں میں آمنے سامنے آئیں گے۔ پہلا میچ تیس جولائی کو جبکہ دوسرا میچ یکم اگست کو کھیلا جائے گا۔ یہ دونوں میچ کولمبو میں منعقد کیے جائیں گے۔