ترک وزیر خارجہ مولود چاؤش آؤلو نے آذربائیجان کے شہر گنجا پر آرمینیا کے مبینہ میزائل حملے کو جنگی جرم قرار دیا ہے۔ انہوں نے اس ظلم و بربریت کا ذمہ دار آرمینیا کو ٹھہرایا۔ تیرہ اکتوبر کو روسی صدر ولادیمیر پوٹین اور ترک صدر رجب طیب ایردوآن نے آرمینیا اور آذربائیجان کو صبر و تحمل کا مظاہرہ کرنے کی تلقین کی تھی۔

نگورنو کاراباخ میں ایرانی مفاد کیا ہے؟

ترکی آذربائیجان کے علاقوں سے آرمینیائی فوج کا انخلا چاہتا ہے

میزائل حملے اور آرمینیا کی تردید

ثقافتی و تاریخی شہر گنجہ پر حملے میں ایک درجن سے زائد افراد ہلاک اور چالیس سے زیادہ زخمی ہوئے ہیں۔ وسطی ایشیائی ریاست آذربائیجان کے صدر الہام علیئیف نے بھی حملے اور ہلاکتوں کی تصدیق کی ہے۔ صدر علیئیف نے کہا ہے کہ یہ حملے جنگی جرائم میں شمار ہوتے ہیں اور ذمہ داری کا تعین کیا جانا ضروری ہے۔ ان کا یہ بھی کہنا تھا کہ اگر بین الاقوامی برادری ایسا کرنے میں ناکام رہتی ہے تو ان کا ملک ایسا کرنے سے گریز نہیں کرے گا۔

دوسری جانب آرمینیا نے گنجا شہر کی آبادی پر میزائل حملے کی تردید کی ہے۔ آرمینیائی وزارتِ دفاع نے میزائل حملے کو غلط معلومات کا تسلسل قرار دیا ہے۔ یہ بھی کہا کہ آذری فوج آرمینیائی علاقوں پر راکٹ داغنے کا سلسلہ جاری رکھے ہوئے ہے اور راکٹ متنازعہ علاقے نگورنو کاراباخ کے مرکزی شہر پر بھی گرے، جن سے تین شہری زخمی ہوئے ہیں۔

تاریخی شہر میں تباہی

گنجا نامی شہر آذربائیجان کا دوسرا بڑا شہر ہے اور سرحدی مقام سے خاصا دور بھی ہے۔ یہ حملہ ایک ہفتہ قبل ہونے والی شکستہ اور کمزور جنگ بندی کے ایک ہفتے بعد کیا گیا۔ اس تناظر میں آذری صدر کے خارجہ امور کے مشیر حکمت حاجیئیف کا کہنا ہے کہ وہ انسانی ہمدردی کے تحت کی جانے والی جنگ بندی کے حامی ہیں لیکن آرمینیا صورت حال میں بہتری لانے پر تیار نہیں اور رہائشی علاقوں پر حملے جاری رکھے ہوئے ہے۔

گنجا شہر پر کیے گئے حملے کی تصاویر بھی ملکی اور غیر ملکی میڈیا کو فراہم کی گئی ہیں۔ اس حملے میں میزائل کئی رہائشی عمارتوں پر گرے اور کم از کم ہونے والی ہلاکتیں تیرہ بتائی گئی ہیں۔ ہلاک ہونے والوں میں دو بچے بھی شامل ہیں۔ ہلاکتوں میں اضافے کا امکان ہے کیونکہ پچاس سے زائد زخمیوں میں کچھ کی حالت طبی ذرائع نے تشویشناک بتائی ہے۔

آذربائیجان کی حکومت نے گنجہ کی متاثرہ عمارت سے ملبہ ہٹانے کی فوٹیج بھی جاری کر دی ہے۔ حکام کے مطابق ملبے میں دبے افراد کو نکالا بھی جا رہا ہے۔ مقامی بلدیاتی حکومت نے رہائشی عمارتوں کو پہنچنے والے نقصان کو شدید قرار دیا ہے۔ یہ بھی بتایا گیا کہ میزائل حملے سے بیس عمارتیں تباہی سے دوچار ہوئی ہیں۔

آذری فوج کا پلہ بھاری ہے، علیئیف

اُدھر آذری صدر کے مشیر حکمت حاجیئیف کا کہنا ہے کہ ان کی فوج نے باغیوں کے قبضے میں سات میں سے دو علاقوں فیضیلی اور جبریل کو آزاد کرا لیا ہے۔ اس جنگی کامیابی کے حوالے سے صدر علیئیف کا کہنا ہے کہ اب تک جنگی صورت حال میں ان کی فوج کا پلہ بھاری ہے۔ انہوں نے یہ بھی کہا کہ کئی دیہات پر بھی قبضہ کیا گیا ہے۔ آذری دفاعی ذرائع نے آرمینیا کے ایک جنگی طیارے کو جبریل علاقے میں مار گرانے کا بھی دعویٰ کیا ہے۔ ان دعووں کا آزاد ذرائع سے تصدیق نہیں ہو سکی ہے۔

سوویت یونین کا زوال اور تنازعہ

جنوبی قفقاذ کے علاقے نگورنو کاراباخ کے تنازعے نے سن 1990 میں سابقہ سوویت یونین کے زوال پر آزاد ہونے والی دو ہمسایہ وسطی ایشیائی ریاستوں میں جنم لیا تھا۔ یہ پورا علاقہ آذربائیجان کی جغرافیائی حدود میں واقع ہے لیکن اس میں تقریاً ڈیڑھ لاکھ آرمینائی نژاد مسیحی بستے ہیں۔ بین الاقوامی طور پر اس پر آذربائیجان کی جغرافیائی حاکمیت تسلیم کی جاتی ہے۔ اس تنازعے کے حل کے لیے امن مذاکرات بدستور التوا کا شکار ہیں۔

ع ح، ع ت (ڈی پی اے، روئٹرز)