24 سے 26 ستمبر تک درجنوں سیاستدان اور ماہرین مغربی سائبیریا کے شہر سَلیکہارڈ Salekhard میں جمع ہوئے تاکہ آرکٹک یا قطب شمالی میں ماحولیاتی تحفظ سے متعلق معاملات پر غور کیا جائے۔ مبصرین کے مطابق روس تیل سے مالا مال آرکٹک کے علاقے پر اپنا حق جتانے کا خواہاں دکھائی دیتا ہے۔

گرین پیس کی طرف سے بحر منجمد شمالی سے تیل نکالنے کے لیے وہاں ڈرلنگ کے خلاف عالمی مہم جاری ہے۔ اس تنظیم کو خدشہ ہے کہ اگر اس علاقے میں تیل سے متعلق کوئی حادثہ رونما ہوتا ہے تو اس کے اثرات وہاں کے ماحولیاتی نظام کے لیے تباہ کن ہوں گے۔ ماہرین بھی اس بات پر متفق ہیں کہ اگر اس سرد سمندر میں تیل کے اخراج کا کوئی حادثہ پیش آیا تو اس پر قابو پانا انتہائی مشکل ہو گا۔

قطب شمالی یا آرکٹک کی برف دنیا کے باقی حصوں کے مقابلے میں دوگنا تیزی سے پگھل رہی ہے۔ برف پگھلنے کی وجہ سے نئے سمندری راستے بن رہے ہیں۔ اس علاقے میں تیل اور گیس کے ذخائر کی تلاش بھی جاری ہے۔ ان تمام انسانی سرگرمیوں کے اثرات ماحول پر پڑ رہے ہیں۔

آرکٹک سے متصل پانچ ممالک امریکا، کینیڈا، ڈنمارک، ناروے اور روس قطب شمالی کے اس علاقے میں اپنی سرحدوں کے دعوے کر رہے ہیں۔ خیال ہے کہ برف سے ڈھکے اس علاقے میں بہت زیادہ قدرتی وسائل موجود ہیں اور یہی اس دوڑ کا سبب بھی ہے۔

روسی کشتی پیٹر 1 نے 2010ء میں شمال مشرق اور شمال مغرب میں یہاں سفر کیا۔ اس راستے پر سفر کبھی ناممکن سمجھا جاتا تھا۔ تاہم بڑھتی ہوئی عالمی حدت نے اس راستے پر سمندری سفر ممکن بنا دیا ہے۔ گزشتہ تین برس سے شمال مغربی راستے پر کئی تجارتی جہاز آتے جاتے نظر آتے ہیں۔

چین کے شہر شنگھائی سے جرمنی کے ساحلی شہر ہیمبرگ تک پہنچنے کے لیے قطب شمالی کا شمال مشرقی راستہ شارٹ کٹ ہے۔ اس راستے سے روس تک سمندری راستہ نہر سوئز کی طرف سے ہو کر آنے والے روایتی راستے کے مقابلے میں 6400 کلو میٹر کم ہے۔

ماہرین ارضیات کا اندازہ ہے کہ آرکٹک کے علاقے میں دنیا میں تیل اور گیس کے کُل ذخائر کا 25 فیصد حصہ موجود ہے۔ ماہرین کے مطابق اس علاقے میں ڈرلنگ کے ماحول پر شدید اثرات مرتب ہو سکتے ہیں لیکن اس کے باوجود اب قطب شمالی میں ڈرلنگ مشینوں کی گرج سنائی دینے لگی ہے۔

آرکٹک کے علاقے میں کروز بحری جہازوں کے ذریعے سمندری سیاحت ایک منافع بخش کاروبار ہے۔ یہاں کی سیاحت خطرات سے خالی نہیں ہے، خاص طور پر سخت سردیوں میں۔ اس کے باوجود سیاح اس علاقے کا سفر کرنے میں بہت دلچسپی رکھتے ہیں۔

تصویر میں دکھائے جانے والے ناروے کے شہر ٹرومزو کے ہوائی اڈے پر اس جہاز پر پرواز سے پہلے اس پر برف جمنے سے بچانے والا یا ڈی آئسنگ اسپرے کیا جا رہا ہے۔ آرکٹک کے علاقے کے فضائی راستوں کے باعث اس خطے میں ایندھن جلنے کے باعث پیدا ہونے والی آلودگی میں اضافہ ہو رہا ہے۔

ڈنمارک، کینیڈا، روس، ناروے اور امریکہ آرکٹک کے مختلف علاقوں پر اپنا حق جتاتے ہیں۔ اقتصادی مقاصد کے باعث وہاں فوجی سرگرمیاں بھی بڑھ رہی ہیں۔ گرین لینڈ کے مشرقی علاقے ڈینیبورگ (یہ جزیرہ ڈنمارک کا حصہ ہے) میں تنصیبات اہمیت اخیتار کر گئی ہیں۔

آرکٹک سے متصل ممالک اس علاقے میں باقاعدگی سے فوجی مشقیں بھی کرتے رہتے ہیں۔ حالانکہ وہاں بظاہر کوئی تنازعہ موجود نہیں ہے تاہم تمام ممالک وہاں اپنی موجودگی ثابت کرنا چاہتے ہیں۔ امریکا وہاں اپنی ایک آبدوز بھی پہنچا چکا ہے۔

آرکٹک سے فائدہ صرف پڑوسی ممالک ہی نہیں اٹھانا چاہ رہے بلکہ چین بھی اس کوشش میں لگا ہوا ہے۔ 2012ء میں چین کا ’سنو ڈریگن‘ نامی بحری جہاز قطب شمالی سے ہو کر یورپ جانے والا پہلا جہاز تھا۔ بیجنگ اب برف کاٹنے والا نیا جہاز بنا رہا ہے اور آرکٹک کونسل میں مبصر ملک بننے کا بھی خواہشمند ہے۔

قطب شمالی کے علاقے سوالبارڈ میں بھارت بھی 2008ء سے ایک ریسرچ اسٹیشن چلا رہا ہے۔ جاپان اور جنوبی کوریا بھی پہلے سے وہاں ریسرچ میں مصروف ہیں۔ آرکٹک کے اس حصے کو ’ہائی نارتھ‘ یا ’اونچا شمال‘ کہتے ہیں۔