آسٹریلوی وائٹ واش نے پاکستانی کرکٹ ٹیم کو بے نقاب کردیا
13 اکتوبر 2014![](https://static.dw.com/image/17531001_800.webp)
تینوں میچ ہارنے والی پاکستانی ٹیم کی بیٹنگ موم کی ناک ثابت ہوئی اور وکٹ کیپر سرفراز احمد کے علاوہ سیریز میں کوئی پاکستانی کھلاڑی مجموعی طور پر سو رنز بھی نہ بنا سکا۔ آسٹریلوی پیسرز نے فواد عالم اور عمرامین جیسے کھلاڑیوں کے بارے میں بھی سلیکٹرز اور ان کے خیر خواہوں کی ساری خوش فہمیاں دور کردیں۔
محمد یوسف کے قبل از وقت باہر ہونے کے بعد سے پاکستانی بیٹنگ مصباح الحق کے گرد ہی گھومتی رہی ہے۔ مصباح نے گزشتہ سال ہی کیلنڈر ائیر میں ایک ہزار تین سو تہتر رنز بنا کر ساری دنیا کو پیچھے چھوڑ دیا تھا مگراب جونہی ان کی فارم نے ساتھ چھوڑا آسمان نے رنگ بدلنے میں دیر نہیں لگائی۔
دبئی ون ڈے میں رن آوٹ ہونے کے بعد ڈریسنگ روم کے بڑوں اور چھوٹوں کے بگڑے تیور دیکھ کر آوٹ آف فارم کپتان نے ابوظہبی کے مردہ میچ میں ٹیم پر بوجھ بننا گوارا نہ کیا۔ مصباح گزشتہ نو بین الاقوامی اننگز میں کوئی نصف سنچری نہیں بنا سکے تاہم حالات کی ستم ظریفی یہ تھی کہ کپتانی انہیں شاہد آفریدی کے سپرد کرنا پڑی جو خود عرصہ دراز سے ٹیم پر بوجھ بنے ہوئے ہیں۔
آفریدی گزشتہ گیارہ بین الاقوامی میچوں میں صرف دس وکٹیں لے سکے ہیں اوران کی بیٹنگ کا ذکر نہ ہی کیا جائے تو بہتر ہوگا۔ مگر اس کے باوجود، خلیل خاں فاختائیں اڑانا چاہتے ہیں۔ شاہد آفریدی کو تین برس پہلے اعجاز بٹ کے زمانے میں ٹیم کے راز ذرائع ابلاغ کو فاش کرنے اور کرکٹ بورڈ حکام کو برا بھلا کہنے کی پاداش میں کپتانی سے ہاتھ دھونا پڑے تھے۔
بعد ازاں کئی بار ڈسپلن کی دھجیاں اڑانے پر بھی وہ دوبارہ کپتان بننے کی خواہش کبھی چھپا نہیں سکے۔ حال ہی میں پی سی بی نے انہیں ٹوئنٹی ٹوئنٹی میں قیادت سونپ کر مصباح پر دباؤ اور بڑھا دیا۔
پاکستانی کرکٹ ٹیم میں گروہ بندی سالہا سال سے موجود ہے۔ احمد شہزاد اور عمر اکمل جیسے کھلاڑی شاہد آفریدی کے قریب سمجھے جاتے ہیں جبکہ چیف سلیکٹر اور منیجر معین خان کی درپردہ حمایت بھی انہیں حاصل ہے۔ جبکہ اپنے دو دیرینہ ہم دم سعید اجمل اور محمد حفیظ کے ٹیم سے باہر ہونے پر مصباح الحق کی تنہائی بڑھ چکی ہے۔
دوسرے ون ڈے کے بعد جب اپنی کھال میں مست رہنے والے مصباح سے پوچھا گیا کہ آیا وہ قیادت چھوڑ رہے ہیں تو کپتان کا کہنا تھا، ’’مشکل وقت ہر انسان کی زندگی میں آتا ہے۔ فائٹ کرنے کی کوشش کروں گا دیکھیے کیا ہوتا ہے۔‘‘
دوسری طرف پاکستان کرکٹ بورڈ نے، سامنے آتے بھی نہیں اور صاف چھپتے بھی نہیں، کے مصداق عالمی کپ میں کپتانی کا فیصلہ خود مصباح الحق پر چھوڑ دیا ہے۔ چیئرمین پی سی بی نے اپنی سفارتکاری کی زبان میں بتایا، ’’میں نے مصباح کو کہا ہے کہ آپ کو ورلڈ کپ تک کپتان مقرر کرنے پر ہمیں تنقید کا سامنا کرنا پڑا۔ اب آپ کے رنز نہ بنانے پر اور تنقید ہو گی۔ ہم اب بھی آپ کے ساتھ ہیں مگر فیصلہ آپ نے کرنا ہے‘‘۔ یوں مصباح الحق کے لیے اب سب کچھ نوشتہ دیوار ہے۔
پاکستانی میڈیا اوراسپانسرز ایک عرصے سے شاہد آفریدی کو کپتان مقرر کرنے کے حق میں مہم چلا رہے تھے۔ اب لوہا گرم دیکھ کر آفریدی شاہد ابوظہبی میں ایک رن کے فرق سے چوٹ تو نہ لگا سکے مگر ان کی بے چینی بڑھتی جا رہی ہے۔ ابو ظبی میچ کے بعد شاہد کا کہنا تھا کہ مجھے کپتان بنانا ہے تو جلدی کیجیے کیونکہ عالمی کپ سر پر ہے۔ کوئی بھی کپتان ہو تو اسے معلوم ہونا چاہیے کہ ورلڈ کپ میں کیا کرنا ہے۔
پی سی بی بھلے ہی شاہد آفریدی کی خواہش کا احترام کرے مگر اسے مصباح کے مقام کو نہیں بھولنا چاہیے جس نے تمام کپتانی ابتلا کے دور میں دیار غیر میں کی ہے۔