پاکستان کرکٹ بورڈ کے اعلان کے مطابق یہ کھلاڑی پریکٹس کے لیے فی الحال نیشنل کرکٹ اکیڈمی میں فراہم کردہ سہولیات استعمال نہیں کر سکتے اور بحالی کے پلان کی تکمیل تک وہ قومی کرکٹ ٹیم کے کھلاڑیوں کے ساتھ پریکٹس بھی نہیں کر سکتے۔ محمد آصف نے کرکٹ بورڈ کی جانب سے بحالی کے پروگرام پر عمل کرنے کا عندیہ دیتے ہوئے کہا کہ وہ اِسپر جلد از جلد عمل کر کے گریڈ کرکٹ شروع کرنا چاہتے ہیں تاکہ قومی کرکٹ ٹیم میں شامل ہونے کے لیے فرسٹ کلاس کرکٹ کھیل سکیں۔

پاکستان کرکٹ بورڈ کے چیئرمین شہریار احمد خان نے نیوز ایجنسی اے ایف پی سے گفتگو کرتے ہوئے واضح کیا کہ دونوں کرکٹرز کو مستقبل میں بدعنوانی سے بچنے اور نگرانی کے موجودہ عمل کے حوالے سے ایک لیکچر بھی دیا گیا ہے اور یہ اُن کی کرکٹ کھیلنے کے عمل کی بحالی کا ایک حصہ ہے۔ محمد آصف، سلمان بٹ اور محمد عامر کو سن 2011 میں اسپاٹ فکسنگ کے تحت انٹرنیشنل کرکٹ کونسل نے پانچ برس کے لیے ہر قسم کی کرکٹ کھیلنے سے محروم کر دیا تھا۔ یہ کھلاڑی انگلینڈ کے سن 2011 کے دورے کے دوران اسپاٹ فکسنگ کے مرتکب ہوئے تھے۔

محمد آصف اور سلمان بٹ کی بحالی کے پلان کے تحت اِنہیں مختلف مقامات پر خصوصی لیکچر دینے ہوں گے اور اِن میں وہ اپنے جرم کو جہاں تسلیم کریں گے وہاں وہ احساسِ ندامت اور پچھتاوے کو بھی بیان کریں گے۔ یہ دونوں کھلاڑی اپنے لیکچرز مستقبل کے کرکٹرز کے سامنے بھی دیں گے۔ بحالی کے پلان کی تکمیل کے بعد یہ کھلاڑی ملک کے نچلی سطح پر کھیلنے کے مجاز ہوں گے۔ پی سی بی کے چیئرمین کے مطابق سلمان بٹ اور محمد آصف کے کھیل کی نگرانی اُسی انداز میں کی جائے گی جس طرح محمد عامر کی گئی تھی۔ پاکستانی میڈیا کے مطابق بحالی کے پروگرام کے تحت سلمان بٹ اور محمد آصف کو ستمبر اور اکتوبر میں مختلف فورمز پر کم از کم سولہ لیکچر دینے ہوں گے۔

انٹرنیشنل کرکٹ کونسل نے تیز بالر محمد عامر پر رواں برس جنوری میں کرکٹ کھیلنے کی پابندی ختم کر دی تھی۔ سلمان بٹ اور محمد آصف پر پابندی کا اختتام دوستمبر سے ہو گا۔ تینوں پاکستانی کھلاڑیوں کے ساتھ اُن کے ایجنٹ مظہر مجید کو بھی کرپشن کا مرتکب ٹھہرایا گیا تھا۔ ان کو قید کی مختلف المیعاد سزائیں بھی دی گئی تھیں، جو انہوں نے انگلینڈ کی جیلوں میں کاٹی تھیں۔ محمد عامر پر پابندی کا جلد خاتمہ انٹرنیشنل کرکٹ کونسل کے کوڈ آف کنڈکٹ میں ترمیم کے باعث ممکن ہوا تھا۔ سلمان بٹ اور محمد آصف کو پہلی ستمبر سے شروع ہونے والے ٹی ٹوئنٹی قومی ٹورنامنٹ میں لاہور اور سیالکوٹ نے اپنی اپنی ٹیموں شامل کرنے کا اعلان کیا تھا۔ پاکستان کرکٹ بورڈ کے تازہ بیان کے بعد وہ اب ٹی ٹوئنٹی ٹورنامنٹ کھیلنے کے اہل نہیں رہے۔