شمالی اور جنوبی کوریا کی مشترکہ سرحد پر ابھی بھی کئی مقامات پر انتہائی بھاری ہتیھار نصب ہیں۔ تاہم اب یہ دونوں ممالک دشمنی ختم کرنے کا فیصلہ کر چکے ہیں۔ اب مشترکہ سرحد پر قائم دو سو سے زائد حفاظتی چوکیوں کو تباہ کیا جا رہا ہے۔ شمالی کوریا نے مزید نو چوکیوں کو دھماکے سے اڑا دیا۔

گوئٹے مالا میں فوئیگو نامی آتش فشان راکھ اور شعلے اگل رہا ہے۔ دور سے دیکھنے پر یہ بہت ہی خوبصورت منظر دکھائی دیتا ہے۔ جون میں اس آتش فشان کے پھٹنے سے تقریباً دو سو افراد ہلاک ہوئے تھے۔

جرمنی میں شدید گرمی اور ایک سنہرے موسم خزاں کے بعد ملک بھر میں کہر چھانا شروع ہو گئی ہے۔ تاہم دریاؤں میں پانی کی کم سطح کی وجہ سے موسم میں کسی بڑی تبدیلی کی توقع کم ہی ہے یعنی بہت زیادہ بارشیں یا برف باری کا امکان کم ہی ہے۔

یہ تصویر فانپائی نامی ایک چینی گاؤں کی ہے۔ اس علاقے کے قدیمی باشندے ابھی بھی روایتی انداز میں بال کٹواتے ہیں۔ یہاں پر کمان نما چھری باک کاٹنے کے لیے ابھی بھی استعمال ہوتی ہے۔

میکسیکو کے شہر لیون میں آج کل ہاٹ ایئر غباروں کا میلہ جاری ہے۔ دنیا کے تیئس ممالک کے دو سو زائد ہاٹ ایئر بیلون فضا میں بلند ہوتے دکھائی دیتے ہیں۔ اس فیسٹیول میں پانچ لاکھ افراد نے شرکت کی تھی۔

یہ تصویر بھارت کے زیر انتظام کشمیر کی ہے، جہاں سری نگر سے تعلق رکھنے والے تین بچے اسکول سے اپنے گھر واپس جا رہے ہیں۔ ڈل جھیل پر ایک اس چھوٹی سی کشتی کو چلانا کوئی آسان کام نہیں۔

گزشتہ دنوں سوئٹزرلینڈ کے شہر جنیوا میں گلابی رنگ کے اس ہیرے کی پچاس ملین ڈالر میں نیلامی ہوئی، جو ایک ریکارڈ ہے۔ ’پنک لیگیسی‘ نامی اس ہیرے کو معروف امریکی جوہری ہیری ونسٹن نے خریدا۔ یہ ہیرا ایک سو قبل جنوبی افریقہ میں دریافت ہوا تھا۔

پلاؤ،پیلاو یا پلوو کو عام طور پر ایک مشرقی کھانا تصور کیا جاتا ہے۔ یہ سبزی، گوشت اور مچھلی کے ساتھ ساتھ متعدد دیگر اشیاء کے ساتھ ملا کر پکایا جاتا ہے۔ یہ تصویر تاجکستان کی ہے اور یہ اس ملک کا معروف اوشی پلاؤ ہے۔ اوشی پلاؤ کو عالمی ثقافتی ورثے کا درجہ بھی حاصل ہے۔

سات سالہ جوناتھن میکسکیو کے ایک مہاجر کیمپ میں سستانے کے لیے رکا ہوا ہے۔ تاہم جوناتھن رودریگیز کی منزل امریکا ہے۔ وہ آنکھوں میں ایک بہتر زندگی کا خواب سجائے امریکا جانا چاہتا ہے۔ اس کا قافلہ دو سو افراد پر مشتمل ہے۔

وسطی امریکی ممالک کے تقریباً سترہ سو افراد امریکا کی جانب رواں دواں ہیں۔ اس کے علاوہ ہنڈوراس، گوئٹے مالا اور ایل سلواڈور کے مزید ہزاروں افراد بھی غربت اور تشدد سے تنگ آ کر میکسیکو کے راستے امریکی سرحد کی جانب بڑھ رہے ہیں۔ تاہم امریکا میں ان مہاجرین کو خوش آمدید نہیں کہا جائے گا۔ ان کے استقبال کے لیے امریکی فوجی میکسیکو کی سرحد پر خار دار تار کی باڑ نصب کر رہے ہیں۔

تائیوان میں ’وانگ یہ‘ فیسٹیول کے آٹھویں اور آخری روز عقیدت مند کاغذ اور لکڑی سے بنے ہوئے ایک بحری جہاز کو نذر آتش کرتے ہیں۔ ان کے خیال میں اس طرح دنیا سے بدی، بیماری اور بدقسمتی کا خاتمہ ہو جاتا ہے اور پھر صرف انسانیت اور امن باقی بچ جاتا ہے۔ ایک ہزار سال پرانا یہ فیسٹیول ہر تین سال بعد منایا جاتا ہے۔

دوسری عالمی جنگ کے بعد ماؤزے تنگ نے کیمونسٹ پارٹی آف چائنا کے پرچم تلے سیاسی حریف چیانگ کائی شیک سے اقتدار چھیننے کی کوشش کی۔ کومنتانگ پارٹی کے سربراہ کائی شیک اس لڑائی میں ناکام ہوئے اور ایک چھوٹے سے جزیرے تائیوان پر فرار ہو گئے۔ تب تائیوان کا جزیرہ اطراف کے مابین پراپیگنڈے کا مرکز بن گیا۔ کیمونسٹ پارٹی تائیوان کو ’آزاد‘ کرانا چاہتی تھی جبکہ کومنتانگ ’مین لینڈ چین پر دوبارہ قبضہ‘ کرنا چاہتی تھی۔

پچاس کی دہائی میں کیمونسٹ پارٹی آف چائنا نے تائیوان میں سکونت پذیر چینی ہم وطنوں کو چار پیغامات ارسال کیے۔ یہی پیغامات دراصل چین کی تائیوان سے متعلق ریاستی پالیسی کی بنیاد قرار دیے جاتے ہیں۔ تب بیجنگ نے تائیوان کو خبردار کیا تھا کہ وہ ’سامراجی طاقت‘ امریکا سے گٹھ جوڑ نہ کرے۔ اس دور میں اطراف کے ایک دوسرے پر توپ خانے سے حملے بھی جاری رہے۔

اقوام متحدہ کی جنرل اسمبلی نے سن 1971 میں تسلیم کر لیا کہ عوامی جمہوریہ چین کی حکومت ہی اس ملک کی جائز نمائندہ حکومت ہے۔ یوں جمہوریہ چین ROC (تائیوان) کو اقوام متحدہ کے تمام اداروں سے بےدخل کر دیا گیا۔ اس تصویر میں جمہوریہ چین کہلانے والے تائیوان کے اس دور کے وزیر خارجہ چاؤ شو کائی اور سفیر لیو چی کی پریشانی اور مایوسی نمایاں ہے۔

چین کی طرف سے تائیوان کو آخری پیغام یکم جنوری سن 1979 کو ارسال کیا گیا تھا۔ تب کیمونسٹ پارٹی کے رہنما دینگ سیاؤپنگ نے جنگی کارروائیوں کو ترک کر دیا تھا اور تائیوان کے ساتھ باہمی تعلقات میں بہتری کا اعلان کیا تھا۔ ان کا کہنا تھا کہ وہ تائیوان کے ساتھ پرامن اتحاد کی کوشش کریں گے۔ تاہم تائیوان کی طرف سے عالمی سطح پر چین کی نمائندگی کے حق کو چیلنج نہیں کیا گیا تھا۔

چین اور امریکا کی قربت کے باعث بیجنگ حکومت کی تائیوان سے متعلق پالیسی میں جدت پیدا ہوئی۔ یکم جنوری سن 1979 کو ہی چین اور امریکا کے سفارتی تعلقات بحال ہوئے۔ تب امریکی صدر جمی کارٹر نے تسلیم کر لیا کہ پورے چین کی نمائندہ اور جائز حکومت بیجنگ میں ہی ہے۔ تب تائیوان میں امریکی سفارتخانے کو ایک ثقافتی مرکز کی حیثیت دے دی گئی تھی۔

امریکی صدر جمی کارٹر سے ملاقات سے قبل ہی چینی رہنما دینگ سیاؤپنگ نے ’ایک ملک اور دو نظام‘ کی پالیسی متعارف کرائی، جس میں تائیوان کو اجازت دی گئی کہ وہ اپنا سوشل سسٹم برقرار رکھے اور چین کے ساتھ اتحاد کے بعد بھی بے شک اس پر عمل پیرا رہے۔ تاہم اس وقت کے تائیوانی صدر چیانگ چینگ کاؤ فوری طور پر اس تجویز سے متفق نہ ہوئے۔ لیکن پھر سن 1987 میں انہوں نے ’بہتر نظام کے لیے ایک چین‘ کے اصول کی حمایت کر دی۔

سن 1986 میں تائیوان کی پہلی اپوزیشن سیاسی جماعت ڈیموکریٹک پروگریسیو پارٹی DPP معرض وجود میں آئی۔ سن 1991 میں اس اپوزیشن پارٹی نے تائیوان کی آزادی کا نعرہ بلند کیا۔ اس پارٹی کے منشور میں شامل تھا کہ تائیوان ایک خود مختار ریاست ہے، جو چین کا حصہ نہیں ہے۔

سن 1992 میں تائی پے اور بیجنگ کے مابین ہانگ کانگ میں ایک غیر رسمی ملاقات میں باہمی تعلقات کے حوالے سے ایک سیاسی معاہدہ طے پایا۔ ’سن بانوے کے اتفاق رائے‘ کے نام سے مشہور اس معاہدے کے تحت اطراف نے ایک چین کی پالیسی پر اتفاق تو کر لیا لیکن اس تناظر میں دونوں کی تشریحات میں فرق نمایاں رہا۔ اس کے ایک سال بعد دونوں کے اعلیٰ ترین مذاکراتی نمائندوں وانگ (دائیں) اور کو نے سنگاپور میں ایک اور ملاقات کی تھی۔

تائیوان کے اولین جمہوری صدر اور KMT کے رہنما لی ٹینگ ہوئی نے سن 1995 میں ڈی ڈبلیو سے گفتگو کرتے ہوئے کہا کہ تائیوان سے باہر کسی بھی ملک سے باہمی تعلقات کی نوعیت ایسی ہو گی جیسی کہ دو ریاستوں کے مابین ہوتی ہے۔ ان کا یہ بیان بیجنگ سے آزادی کے اعلان سے انتہائی قریب تصور کیا گیا تھا۔

تائیوان کی اپوزیشن ڈیموکریٹک پروگریسیو پارٹی DPP نے سن 2000 کے صدارتی الیکشن میں کامیابی حاصل کر لی۔ تب تائیوان میں ہی پیدا ہونے والے شین شوئی بیَان صدر کے عہدے پر فائز ہوئے، جن کا مین لینڈ چین کے ساتھ کبھی کوئی تعلق نہیں رہا تھا۔ یوں تائیوان میں کومنتانگ پارٹی کی پچپن سالہ حکومت کا خاتمہ ہوا۔ اس سیاسی تبدیلی کا مطلب یہ لیا گیا کہ اب تائیوان کا چین سے کچھ لینا دینا نہیں۔

سن 2000 کے الیکشن میں ناکامی کے بعد کومنتانگ پارٹی نے ’سن بانوے کے اتفاق رائے‘ کے حوالے سے اپنے نظریات میں ترمیم کر لی۔ اسی سبب ’ون چائنا پالیسی کی مختلف تشریحات‘ سے متعلق یہ معاہدہ تائیوان میں آج بھی زیربحث ہے۔ اس کی ایک وجہ یہ بھی تھی کہ سن انیس سو بانوے میں ہونے والے مذاکرات میں کوئی باضابطہ سرکاری موقف واضح نہیں کیا گیا تھا۔

بیجنگ حکومت ’سن بانوے کے اتفاق رائے‘ کو تائیوان کے ساتھ تعلقات کی سیاسی اساس قرار دیتی ہے۔ چین میں کیمونسٹ پارٹی کے اقتدار میں آنے کے بعد اطراف کے مابین ہوئی پہلی سمٹ میں چینی صدر ہو جن تاؤ (دائیں) اور لیان زہان نے ’سن بانوے کے اتفاق رائے‘ کی بھرپور حمایت کی اور ’ون چائنا پالیسی‘ کو بنیادی اصول تسلیم کر لیا۔

تائیوان میں سن 2008 کے صدارتی الیکشن میں کامیابی کے بعد کومنتانگ پارٹی دوبارہ اقتدار میں آ گئی۔ سن 2009 میں تائیوانی صدر ما ینگ جیو نے ڈی ڈبلیو کو دیے گئے ایک انٹرویو میں کہا کہ تائیوان امن اور سکیورٹی کی ضمانت ہونا چاہیے۔ ان کا مزید کہنا تھا کہ تائی پے اس مقصد کے حصول کے انتہائی قریب پہنچ چکا ہے اور بنیادی طور پر ’ہماری سمت درست ہے‘۔

سن 2016 کے صدارتی الیکشن میں سائی انگ وین کو کامیابی ملی تو تائیوان (جمہوریہ چین) میں آزادی کی تحریک میں ایک نیا جوش پیدا ہوا۔ سائی انگ وین ’سن بانوے کے اتفاق‘ کو متنازعہ قرار دیتی ہیں۔ ان کے خیال میں دراصل یہ ڈیل تائیوان میں چینی مداخلت کا باعث ہے۔ سائی انگ وین نے چینی صدر کی طرف سے تائیوان کے چین ساتھ اتحاد کے بیان پر بھی بہت سخت ردعمل ظاہر کیا ہے۔