سنہرے بال، نیلی آنکھیں، پتلی کمر، ابھری ہوئی چھاتیاں اور لمبی ٹانگیں: یہ وہ پہلی باربی ڈول تھی، جسے نو مارچ 1959ء کو ماٹیل نامی کمپنی نے متعارف کرایا تھا۔ یہ گڑیا جلد ہی دنیا بھر کے بچوں کے کمروں کی زینت بنتی چلی گئی۔

بہت سی بچیوں کے کمرے باربی ڈول رومز دکھائی دینے لگے۔ کمرے کی الماریاں باربی اور اس کے دوست کین کے سونے کے کمرے اور ڈرائنگ روم ميں تبدیل کی دی گئيں۔ باربی ہمیشہ سے ہی فیشن کی دلدادہ رہی ہے اور ملبوسات کے نت نئی کلیکشن سے باربی کی الماری بھری رہتی ہے۔ باربی زیر جامہ ملبوسات، سوئم سوٹ، اونچی ایڑھی والے جوتے اور گیلس بھی پہنتی ہے۔

1980ء کی دہائی کے اوائل سے باربی اور کین بچوں کے کھیلنے کےکمروں میں ساتھ ساتھ دکھائی دنیا شروع ہوئے۔ اس گڑیا اور گڈے کے حوالے سے محبت کی بے پناہ کہانیاں منسوب کی جاتی ہیں۔ جرمنی میں باربی کی ایک سستی نقل بھی موجود ہے، جسے پیٹرا کا نام دیا گیا ہے۔ ان دونوں گڑیاؤں کے معیار میں بہت فرق ہے۔

باربی اور پیٹرا کا کوئی موزانہ ہے ہی نہیں۔ بہت واضح ہے کہ ماٹیل نامی کمپنی اپنی باربی کے ساتھ اول نمبر پر ہے۔ 1980ء کی دہائی سے باربی کو حالات اور فیشن کے مطابق ڈھالنے کا سلسلہ جاری ہے۔ باربی کو اب تک ڈاکٹر، خلاء نورد، فائر بریگیڈ کارکن، مینیجر اور فوجی کے روپ میں متعارف کرایا جا چکا ہے۔

2000ء کی دہائی میں باربی نئے انداز سے سامنے آئی یعنی اب یہ صرف ایک ماڈل نہیں تھی۔ اب اس کے کپڑے کم گلیمرس ہو کر عام استعمال کے کپڑوں میں تبدیل ہو گئے۔ 2016ء میں ماٹیل نے باربی تین مختلف سائزوں میں بنانی شروع کی تھی، چھوٹا، درمیانہ اور بڑا۔

ساٹھ برس قبل کسی کے وہم و گمان میں بھی نہیں ہو گا کہ 2017ء میں ماٹیل حجاب پہنے ہوئے باربی متعارف کرا دے گا۔ اسے امریکی شمیر باز ابتہاج محمد سے متاثر ہوتے ہوئے بنایا گیا تھا۔ ابتہاج نے 2016ء کے ریو اولمپکس میں پہلی باحجاب خاتون کھلاڑی کے طور پر اپنے ملک کی نمائندگی کی تھی۔

جلد ہی کوئی بھی ایسا پیشہ یا مذہب نہیں ہو گا، جو باربی اپنا نہ چکی ہو۔ اس طرح باربی افریقہ تک پہنچ گئی۔ تاہم افریقی باربی نیروبی جیسے بڑے اور جدید شہری کی باسی نہیں بلکہ روایتی لباس میں ملبوس تھی۔ کینیا کی باربی بین الاقومی ڈالز کلیکشن کا حصہ ہے۔

اس تصویر میں درمیان والی باربی میکسیکو کی معروف آرٹسٹ فریڈا کالو سے متاثر ہو کر بنائی گئی ہے۔ اس آرٹسٹ کی کمپنی نے بعد ازاں جملہ حقوق کی خلاف ورزی کی وجہ سے ماٹیل پر مقدمہ کر دیا تھا، جس کے بعد اس گڑیا کی فروخت روک دی گئی تھی۔

نت نئی باربی گڑیا متعارف کرانے اور اسے نیا انداز دینے کا سلسلہ شاید کبھی نہیں رکے۔ 2019ء کے باربی سیٹ میں وہیل چیئر پر بیٹھی ہوئی اور ایک مصنوعی ٹانگ والی باربی کو شامل کیا گیا۔ کمپنی کو یہ سمجھ آ گیا ہے کہ بچوں کے کمروں کی سجاوٹ کے لیے صرف سنہرے بالوں، نیلی آنکھوں اور پتلی کمر والی باربی ہی لازمی نہیں۔