دوسری طرف نوبل فاؤنڈیشن نے خبردار کیا ہےکہ اگر سویڈش اکیڈمی نے اپنی ساکھ بحال نہ کی تو یہ فاؤنڈیشن کسی اور گروپ کو اس انعام کا فیصلہ کرنے کی ذمہ داری سونپ سکتی ہے۔ نوبل فاؤنڈیشن کی طرف مزید کہا گیا ہے، ’’ہم پر امید ہیں کہ سویڈش اکیڈمی نے جو اقدامات کیے ہیں وہ آنے والے وقت میں نئی راہیں کھولیں گےاور انعامات کا فیصلہ کرنے کے حوالے سے ادارے کا اعتماد بحال ہوگا۔‘‘

نوبل فاؤنڈیشن کے ترجمان کا مزید یہ بھی کہنا تھا، ’’بہت سی مثبت تبدیلیاں سامنے آئی ہیں جیسا کہ نئے ارکان کا الیکشن، ارکان کی طرف سے استعفٰی دینے اور کسی  رکن کو کمیٹی سے الگ کرنے کا حق وغیرہ۔ اس سے یہ بات بھی واضح ہوجاتی ہے کہ اب اکیڈمی ایسے لوگوں کو اپنا حصہ نہیں بنائے گی جو متنازعہ ہوں یا جن کے خلاف کسی جرم کے سلسلے میں تحقیقات ہو رہی ہوں۔‘‘

نوبل فاؤنڈیشن کا مزید یہ موقف بھی سامنے آیا کہ سویڈش اکیڈمی پر لوگوں کا اعتماد بحال ہونے میں یقیناﹰ کچھ وقت لگے گا، مگر صورت حال اب پہلے سے بہتر ہے۔

گزشتہ برس جنسی زیادتی کے ایک معاملہ سامنے آنے کے بعد ادب کے نوبل انعام کا فیصلہ کرنے والی سویڈش اکیڈمی تنازعے کی زد میں آ گئی تھی اور اسی باعث سال 2018ء کے لیے ادب کے نوبل انعام کا اعلان بھی منسوخ کر دیا گیا تھا۔

ژاں کلود آرنو سویڈش اکیڈمی کی ایک سابق رکن کے شوہر ہیں۔ ان نہیں گزشتہ برس 2011 میں ہونے والے جنسی زیادتی کے دو واقعات کا ذمہ دار قرار دیا گیا تھا۔ صرف یہی نہیں بلکہ آرنو نے مبینہ طور پر سات مرتبہ ادب کے نوبل انعام حاصل کرنے والوں کے نام اعلان سے پہلے ہی لیک کر دیے تھے۔

سویڈش اکیڈمی کی طرف سے آج منگل پانچ مارچ کو اعلان کیا گیا ہے کہ اکیڈمی کے ایک رُکن ہوراسے انگال نے جو ژاں کلود آرنو کے حامی تھے، اکیڈمی کی رکنیت سے استعفیٰ دے دیا ہے۔

ادب کے نوبل انعام دیے جانے کا سلسلہ شروع ہونے کے بعد گزشتہ برس یہ دوسرا موقع تھا جب اس انعام کا اعلان مؤخر کیا گیا۔ قبل ازیں ایسا 1943 میں دوسری عالمی جنگ کے سبب ہوا تھا۔

سویڈش اکیڈمی کی جانب سے یہ بتایا گیا ہے کہ سال 2018ء اور 2019ء کے لیے ادب کا نوبل انعام حاصل کرنے والوں کے ناموں کا اعلان رواں برس اکتوبر میں کیا جائے گا۔ جبکہ یہ انعام دینے کی تقریب ہر سال 10دسمبر کو منعقد کی جاتی ہے جو الفریڈ نوبل کا یوم وفات ہے۔

ر ا / ا ب ا (ایسوسی ایٹڈ پریس)