اس وقت مالی ٹیکنالوجی کی حامل بڑی کمپنی وائرکارڈ کو حیران کن انداز میں دو ارب ڈالر سے زائد کی رقم کے لاپتہ ہونے کا سامنا ہے۔ اس کمپنی نے فرینکفرٹ کے بازارِ حصص میں اپنے شیئرز پر کاروبار کو معطل کر دیا ہے۔ کمپنی نے دیوالیہ قرار دیے جانے کی درخواست بھی عدالت میں جمع کرا دی ہے۔
وائرکارڈ کے چیف ایگزیکٹو آفیسر مارکوس براؤن نے اکاؤنٹنگ اسکینڈل کے تناظر میں جمعرات پچیس جون کو استعفیٰ دے دیا ہے۔ براؤن نے کمپنی کی سربراہی میں تقریباً 1.9 ارب ڈالر کی گمشدگی کا معاملہ کھڑا ہونے کے بعد ہی استعفیٰ دیا۔ یہ اسکینڈل گزشتہ ہفتے آڈٹ کے دوران سامنے آیا تھا اور اس کے بعد جنوبی جرمن ریاست باویریا کے دارالحکومت میونخ کے پبلک پراسیکیوٹر نے انہیں پیر بائیس جون کو گرفتار بھی کر لیا تھا۔ براؤن کو گرفتاری کے بعد عدالت نے ضمانت پر رہا کرنے کا حکم بھی جاری کر دیا ہے۔
تصویر: picture-alliance/AP Photo/M. Schrader
میونخ کے پبلک پراسیکیوٹر کو شبہ ہے کہ مارکوس براؤن نے کمپنی کی مالی اخراجات اور آمدن کی بیلنس شیٹ کو زیادہ بڑھا چڑھا کر پیش کرنے کی کوشش کی ہے۔ یہ بھی بتایا گیا کہ بیلنس شیٹ میں ایسی فرضی تبدیلیوں سے کمپنی کے سابق 'سی ای او‘ زیادہ سرمایہ کاروں کو وائرکارڈ کی جانب راغب کرنے کی کوشش میں ہو سکتے ہیں اور وہ اس طرح زیادہ گاہکوں کو حاصل کرنے کی کوشش میں بھی ہو سکتے تھے۔
مارکوس براؤن کے علاوہ کمپنی کے تین اور اعلیٰ مینیجروں کے خلاف بھی مالی بےقاعدگیوں کی تفتیش شروع کر دی گئی ہے۔ یہ امر اہم ہے کہ وائرکارڈ میں اربوں ڈالر کی گمشدگی سالانہ آڈٹ کے دوران معلوم ہوئی تھی۔ آڈیٹرز کا کہنا ہے کہ ایسا دکھائی دیتا ہے کہ کمپنی کے اکاؤنٹ میں تقریباً دو ارب کی رقم کبھی موجود بھی نہیں تھی۔
تصویر: picture-alliance/dpa/P. Kneffel
اس مبینہ غبن کے سامنے آنے کے بعد وائرکارڈ کے شیئرز میں حیران کن کمی ہو گئی تھی۔ تفتیش کاروں کا کہنا ہے کہ مالی بے قاعدگی کو فوجداری یا مجرمانہ غفلت کے تناظر میں لیا جا سکتا ہے۔
وائرکارڈ کمپنی کو جرمنی میں حیران کن انداز میں ترقی کرنے والی کمپنیوں میں شمار کیا جاتا تھا۔ سن 2019 میں اس کمپنی کے مرکزی اکاؤنٹ پر میڈیا نے بعض رپورٹس بھی نشر کی تھیں۔ اس تناظر میں جرمنی میں مالیاتی اداروں کے معاملات پر نگاہ رکھنے والے حکومتی ادارے بافِن (BaFin) نے ان کا واضح نوٹس لینے کے بجائے شکایت کرنے والے سرمایہ کاروں کو نشانہ بنایا۔ وائر کارڈ کی موجودہ صورت حال کو بافِن نے 'تباہ کن‘ قرار دیا ہے لیکن اپنے گزشتہ برس کے موقف کو بھی درست اور صحیح کہا ہے۔
ع ح، ع آ (اے پی، ڈی پی اے)
ماضی میں یورپ کے سب سے بڑے ڈرگ اسٹور کے نیٹ ورک ’شلیکر‘ کے مالک انتون شلیکر اور ان کے بچوں کو ایک جرمن عدالت نے جیل بھیج دیا ہے۔ پکچر گیلری میں دیکھیے پچاس ہزار سے زائد ملازمین پر مشتمل ’شلیکر ایمپائر‘ کیسے دیوالیہ ہوئی۔
تصویر: picture-alliance/dpa/S. Puchner
ترقی کی پہلی سیڑھی
انتون شلیکر نے 1975 ء میں کرشہائم نامی علاقے میں اپنی پہلی ڈروگری مارکیٹ کھولی تھی۔ صرف دو ہی برسوں میں اس کی سو شاخیں کھل چکی تھیں۔ انتون نے نو سال بعد دعوی کیا تھا کہ ان کی ایک ہزار شلیکر شاپس ہیں۔
تصویر: AP
بیرون ملک
1987ء میں شلیکر نے جرمنی سے باہر اپنے قدم جمانے کی ابتدا کی۔ 2007ء میں شلیکر کا دائرہ یورپ کے تیرہ ملکوں تک پھیل چکا تھا اور اس میں کام کرنے والے ملازمین کی تعداد 52 ہزار تک پہنچ گئی تھی۔ پورے یورپ میں شلیکر کی تقریباً دس ہزار شاخیں تھیں۔
تصویر: picture-alliance/dpa
الزامات
دفتر استغاثہ نے شلیکر ڈروگری اسٹور ( ادویات اور عام اشیاء کی دکان) پر صرف یہ الزام عائد نہیں کیا کہ انہوں نے اپنی مالی معاملات چھپائے ہیں بلکہ تمام چھتیس مختلف واقعات میں شلیکر نے ایسے اثاثے بنائے ہیں، جنہیں دیوالیہ میں شامل ہونا تھا۔
تصویر: picture-alliance/dpa/M. Murat
فرد جرم
تین سال تک اشٹٹ گارٹ شہر میں استغاثہ نے شلیکر کے خلاف تفتیشی عمل جاری رکھا اور پھر گزشتہ برس اپریل میں ان پر فرد جرم عائد کی گئی۔ فرد جرم کی دستاویز 270 صفحات پر مبنی ہے۔
تصویر: picture-alliance/dap/M.Murat
عدالتی فیصلہ
جرمن شہر اشٹٹ گارٹ کی ایک عدالت نے 72 سالہ انتون شلیکر اور ان کے دو بچوں لارس اور مائیکے شلیکر کو قید اور ان کی بیوی کو جرمانے کی سزا سنائی ہے۔ انتون ’شلیکر ایمپائر‘ بہت محنت سے کھڑی کی گئی تھی۔
تصویر: picture-alliance/dpa/T. Warnack
اثاثے
ذرائع کے مطابق انتون شلیکر نے پچیس ملین یورو کے اثاثے بنائے ہیں۔ اس دوران ان کی اہلیہ، دونوں بچوں اور ان کے مالی معاملات کی نگرانی کرنے والے دو افراد کو بھی شامل تفتیش کیا گیا۔ ان پر بدعنوانی میں تعاون، دیوالیہ پن میں تاخیر اور فریب کے الزامات عائد کیے گئے تھے۔
تصویر: picture-alliance/dpa/J.-P. Strobel
شلیکر جوڑا اور بدعنوانی
1998ء میں اشٹٹ گارٹ کی ایک عدالت نے شلیکر جوڑے کو بدعنوانی کے ایک مقدمے میں دس ماہ قید کی معطّل سزا سنائی تھی کیونکہ انہوں نے اپنے ایک ملازم کو قانون کے مطابق تنخواہ ادا نہیں کی تھی۔ اس کے چند سال بعد شلیکر کی انتظامیہ بھی اس وقت تنقید کی زد میں آ گئی جب ان کی جانب سے ملازمین کی نگرانی کے لیے غیر قانونی طور پر کیمرے نصب کیے گئے تھے۔
تصویر: picture alliance/dpa
سزا
دیوالیہ پن سے منسلک اگر جرائم بھی ہوں تو اس کی سزا پانچ سال تک کی قید ہے جبکہ سنیگن جرم کی صورت میں سزا دس سال بھی ہو سکتی ہے۔
تصویر: picture-alliance/dpa/N. Försterling
شلیکر بند
شلیکر کا شمار یورپ کی بڑی ڈروگری مارکیٹ میں ہوتا تھا۔ اس گروپ کی جانب جنوری 2012ء نے دیوالیہ پن کی درخواست جمع کروائی گئی تھی۔ شلیکر کو بچانے کی کوشش بے نتیجہ رہی۔ جون 2012ء میں شلیکر بند کر دی گئی تھی اور جرمنی اور یورپ کے دیگر ممالک میں پچاس ہزار سے زائد افراد بے روزگار ہو گئے تھے۔
