ایران کے مستغث اعلیٰ محمد جعفر منتظری کا یہ بیان ایران اور بولیویا کے درمیان منگل کے دن کھیلے جانے والے ایک فرینڈلی میچ کے بعد سامنے آیا ہے۔ اس میچ کو لگ بھگ ایک سو ایرانی خواتین نے اسٹیڈیم جا کر دیکھا تھا۔

منتظری نے کہا، ’’میں آزادی اسٹیڈیم میں خواتین کی موجودگی کے خلاف ہوں۔ ہم ایک مسلمان ریاست ہیں، ہم مسلمان ہیں۔‘‘  مستغیث اعلیٰ نے کہا کہ وہ ہر اس عہدیدار سے خود نمٹ لیں گے جو خواتین کو اسٹیڈیم لانا چاہتا ہے۔

 مستغیث اعلیٰ نے اپنے اس بیان میں مزید کہا، ’’جب ایک عورت اسٹیڈیم جاتی ہے اور وہاں نیم برہنہ مردوں کو دیکھتی ہے تو اس سے معاشرے میں گناہ کو فروغ مل سکتا ہے۔‘‘

ایران کے 1979 کے اسلامی انقلاب کے بعد سے خواتین پر اسٹیڈیم جا کر میچ دیکھنے پر پابندی بھی عائد ہے۔ کٹر نظریات کے حامل مذہبی رہنماؤں کے مطابق عورتوں کا مرد کھلاڑیوں کو نیم برہنہ حالت میں دیکھنا مناسب نہیں ہے۔کھیل کے بعد اسٹیڈیم سے باہر نکلتے وقت مردوں اور  خواتین کا ممکنہ میل جول بھی ان مذہبی رہنماؤں کے لیے باعث فکر ہے۔

کچھ میڈیا رپورٹوں کے مطابق خواتین کو 23 نومبر کو ہونے والے اے ایف سی چیمپئنز لیگ کے میچ کو اسٹیڈیم جا کر دیکھنے کی اجازت ہو گی۔ لیکن ایران کے مستغیث اعلیٰ منتظری کا کہنا ہے کہ وہ ایسا نہیں ہونے دیں گے۔