اعجاز بٹ بھارتی ٹیم کو رضا مند کرنے سر حد پار جائیں گے
23 نومبر 2008ہفتہ کی شب لاہور میں قذافی سٹیڈیم کے باہر ہونے والے تین بم دھماکوں نے پاک بھارت سےریز پر منڈالنے والے خطرے کے بادل مزید گہرے کر دئیے ہیں ۔
پاکستان کرکٹ بورڈ کے چیف آپریٹنگ آفیسر سلیم الطاف نے نامہ نگاروں کو بتایا کہ چیئر مین پی سی بی اعجاز بٹ اس ہفتے سےریز کے انعقاد کے لئے بھارتی ہائی کمشنر ستیا پال سے اسلام آباد میں دوسری ملاقات کریں گے ۔جس میں انہیں وزیر اعظم یوسف رضا گیلانی کی جانب سے کرائی گئی سیکورٹی کی یقین دہانیوں سے آگاہ کیا جائے گا۔ سلیم الطاف کے مطابق رواں ماہ کے آخر میں پاکستان کرکٹ بورڈ کے سربراہ بھارت جا کر اپنے ہم منصب ششنک منوہر اور دیگر حکام سے ملاقاتیں کرکے دورہ پر قائل کرنے کی کوشش کریں گے۔
سلیم الطاف نے بتایا کہ بھارت کی خواتین ٹینس اور شوٹنگ ٹیم کے اسلام آباد میں جاری ایونٹس میں شرکت کے بعد وہ پر امید ہیں کہ ہمسایہ ملک کی کرکٹ ٹیم بھی جنوری میں ٹیسٹ اور ون ڈے سیریز کھیلنے پاکستان آئے گی۔ انہوں نے کہا کہ بھارتی کرکٹ بورڈ کا سیکورٹی وفد دسمبر میں پاکستان آئے گا ۔
سلیم الطاف نے بتایا کہ پاک بھارت سیریز کو نیوٹرل مقام پر منتقل کرنے کا آپشن موجود ہے اور اس بابت انکی ابو ظہبی، دبئی اور شارجہ کے کرکٹ حکام سے بات چیت ہو چکی ہے۔ انگلینڈ نے بھی یہ مقابلے اپنے ہاں کرانے کی پیشکش کی ہے۔سیریز کی بھارت منتقلی کے حوالے چیف آپریٹنگ آفیسر پی سی بی نے بتایا کہ بھارت کے ساتھ دورے کے تبادلے کا فیصلہ مالی معاملات دیکھ کر ہی کیا جا سکتا ہے۔
یاد رہے کہ بھارتی کرکٹ ٹیم کو آئی سی سی کے فیو چر ٹور پرو گرام کے تحت اگلے برس جنوری اور فروری میں پاکستانی سرزمین پر ٹین ٹیسٹ پانچ ون ڈے اور ایک ٹونٹی20میچ کھیلنا ہے۔