زمین کے اندر ایک کان کن کانگو کے ایک دیہات میں ایک کان میں سے سونا حاصل کرنے کے لیے کچ دھات کو جمع کر رہا ہے۔ کان میں جانے والی ٹیم عموماﹰ بیگ اٹھانے اور کھدائی کرنے والے مزدوروں پر مشتمل ہوتی ہے۔ کان کن ہر روز کان کے اندر سرنگ میں چھ سے آٹھ گھنٹے کام کرتے ہیں۔

ایک کان کن تنگ دہانے والی سرنگ کے ذریعے کان کے اندر جانے کے لیے آگے بڑھ رہا ہے جہاں اس کا ساتھی کچ دھات سے بھرے تھیلے اسے منتقل کرنے کے انتظار میں ہے۔ ایک گرام سونے کے حصول کے لیے دو سو کلو گرام کچ دھات کھودنی پڑتی ہے۔ زراعت کے بعد مشرقی عوامی جمہوریہ کانگو میں کان کنی ہی آمدنی کا بنیادی ذریعہ ہے۔

مزدور کان سے سونا بنانے کے عمل کے لیے کچ دھات کے تھیلے اٹھا کر لے جاتے ہیں۔ ہر پھیرے پر مزدور کو پانچ سو مقامی فرانک دیے جاتے ہیں جو صفر اعشاریہ تین پانچ ڈالر کے برابر ہیں۔ یہ ان کانوں میں کام کرنے والے سب سے کم اجرت یافتہ مزدور ہیں۔

اس تصویر میں ایک شخص کو ایک چٹانی سِل کے سامنے گھٹنوں کے بل بیٹھے کچ دھات کو توڑنے کی کوشش کرتے ہوئے دیکھا جا سکتا ہے۔ اس کے بعد کچ دھات کو دو چٹانوں کے درمیان ہاتھوں سے رگڑا جاتا ہے تاکہ سونے کے ذرات کو نرم کیا جا سکے۔

کان سے حاصل ہونے والی کچی دھات کو ایک شخص ایک جگہ جمع کیے پانی میں انڈیل رہا ہے۔ پانی میں شامل کیے گئے اس آمیزے کو اسپیشل ٹیمیں خرید لیتی ہیں۔

ایک مقامی تاجر سونے کو پرکھ کر اندازہ لگا رہا ہے کہ اسے بیچنے والے کو اس سونے کی کیا قیمت لگائی جائے۔ متعدد کان کنوں کی کوشش ہوتی ہے کہ چھوٹی مقدار میں سونے کو مقامی بازار ہی میں بیچ دیا جائے۔

ایک بڑا تاجر سونے کو نائٹرک ایسڈ کے ساتھ تیز آنچ پر گرم کر رہا ہے تاکہ ہر طرح کی کثافت کو ختم کیا جا سکے۔ بڑے تاجر مقامی تاجروں کی نسبت کہیں بڑی مقدار میں سونے کا کاروبار کرتے ہیں۔

گرم کرنے کے بعد سونے کا وزن بجلی کے اسکیل پر کیا جاتا ہے۔ اس مرحلے تک پہنچتے پہنچتے سونا بانوے سے اٹھانوے فیصد تک خالص ہو چکا ہوتا ہے۔ سونے کا خالص پن اس بات پر منحصر ہوتا ہے کہ اسے کس مقام سے نکالا گیا۔

پگھلانے کے بعد سونے کو ایک دھاتی سلاخ میں ڈالا جاتا ہے۔ دہکتی ہوئی بھٹی میں سے نکال کر پگھلے ہوئے سونے کو دوبارہ گریفائٹ کی سلاخ میں ڈالتے ہیں تاکہ اسے ایک شکل دی جا سکے۔

سانچے میں ڈھلی ایک تازہ سونے کی ٹکیہ کو کارکن کام کرنے کی جگہ پر رکھ چھوڑتا ہے۔ اس سانچے سے اب بھی دھویں اٹھتا نظر آ رہا ہے۔

چار اعشاریہ ایک چھ تین کلو گرام سونے کی حامل اس بار کی قیمت اس روز سونے کی عالمی قیمت کے حساب سے تقریباﹰ 167.056 ڈالر بنتی ہے۔ مشرقی عوامی جمہوریہ کانگو میں سونے کی سالانہ پیداوار قریب گیارہ ٹن ہے لیکن اس میں سے زیادہ تر سونا دوسرے ممالک میں اسمگل کر دیا جاتا ہے۔

ایمانوئل ماموح پیشے کے اعتبار سے ایک پادری ہیں لیکن اپنے فارغ اوقات میں وہ کان کنی بھی کرتے ہیں۔ مارچ میں ایمانوئل کو 706 قیراط کا ایک ہیرا ملا تھا، جسے انہوں نے حکومت کے حوالے کر دیا تھا۔ اس کی قیمت 7.7 ملین ڈالر لگی ہے لیکن کم قیمت کی وجہ سے آئندہ ہفتوں کے دوران بیلجیم میں اسے دوبارہ نیلامی کے لیے پیش کیا جائے گا۔

1972ء میں سیرالیون میں ایک بڑا ہیرا دریافت ہوا تھا۔ ’سیرالیون کا ستارہ‘ نامی اس غیر تراشیدہ ہیرے کا مجموعی وزن 969 قیراط تھا اور اسے 17 حصوں میں تقسیم کیا گیا تھا۔ ہیروں کی دولت سے مالا مال اس ملک کا شمار دنیا کے غریب ترین ملکوں میں ہوتا ہے۔ ہیروں کی غیرقانونی تجارت اس ملک میں خانہ جنگی کی وجہ بنی اور اس دوران ہزارہا لوگ موت کے منہ میں چلے گئے۔

اگر قیمتی ترین اور بڑے ہیروں کی بات کی جائے تو بوٹسوانا پہلے نمبر پر آتا ہے۔ یہاں سے 1,111 قیراط کا ہیرا دریافت ہوا، جو ایک ٹینس بال جتنا بڑا تھا۔ یہ دنیا کا دوسرا سب سے بڑا ہیرا ہے۔ اسی کان میں سے بعدازاں مزید دو بڑے اور اعلیٰ معیار کے ہیرے ملے تھے۔

دنیا کا مہنگا ترین ہیرا ساؤتھ افریقہ سے ملا۔ ’’پِنک اسٹار‘‘ نامی یہ ہیرا 71,2 ملین ڈالر میں فروخت ہوا تھا۔ 132.5 قیراط کے اس ہیرے کو تراشنے میں دو سال لگے۔ اب 59.6 قیراط کے اس گلابی ہیرے کو دنیا کا نفیس ترین ہیرا قرار دیا جاتا ہے۔

اداکارہ الزبتھ ٹیلر دلفریب اور چمکدار ہیروں سے محبت کی وجہ سے مشہور تھیں۔ 2011ء میں ان کی وفات کے بعد ان کا ایک نیکلیس سیٹ 140 ملین ڈالر میں فروخت ہوا۔ حالیہ چند برسوں میں ہیروں کی طلب میں اضافہ ہوا ہے اور ان کی قیمتیں بھی بڑھ گئی ہیں۔ بڑھتی ہوئی قیمتیں افریقہ کے لیے امید کی کرن ہیں۔

ہیروں کی تلاش میں یہ غریب کارکن زمبابوے کی کانوں میں بیلچوں اور ہاتھوں سے زمین کھودنے میں مصروف ہیں۔ انہیں ہمیشہ یہ امید رہتی ہے کہ کوئی ایک ہیرا انہیں غربت کی دلدل سے نکال دے گا۔ لیکن ایسے خوش قسمت زیادہ تر وہ ثابت ہوتے ہیں، جو بڑی بڑی مشینوں اور بڑے سرمائے کے ساتھ وہاں کان کنی میں مصروف ہیں۔